OMINISTA yEpopilo nEgameno, Nickey Iyambo okwa uvanekele aaniilonga mUuministeli we kutya ota tsikile noku kambadhala opo a hwepopeke oonkalo dhiilonga yawo.
Sho a popitha iilyo yopolisi, yiilonga yezulonkalo, Iyambo okwa uvaneke kutya ita ka mwena sigo uuna ndoka aanambelewa ye ya mono omagumbo omahwepo, oonguwo dhiilonga, iilongitho, iiyenditho, nnondjambi dhili nawa.Okwa ti aaniilonga oya tegelelwa woo nayo ya longe iinakugwanithwa yawo, sho taya sile oshimpwiyu omaliko gepangelo nogoshigwana.Iyambo okwa ti okuhinga nayi nonuuhasha iiyenditho yepangelo ota ku geelitha ngoka a monika ondjo mokushininga.Okwa ti ita shi vulika oku idhidhimikila ekanitho lyiiyenditho molwa uuhasha nenge elongitho nayi lyiiyenditho nomaliko galwe gepangelo.Okwa ti omolwa omaihumbato omawinayi gaaniilonga yamwe omaliko gepangelo oga yonuka. Okwa tseyitha woo kutya Uuministeli we owalanda iiyenditho 198 iipe yi longithwe kopolisi, noshowo iiyenditho 24 iipe yilongithwe kaanambelewa miilonga yezulonkalo.Okwa ti oonguwo dhiilonga odha mbesitelwa na ina hala okumona we aanambelewa ya zala oonguwo dhagonyatala.Iyambo okwa lombwele amushanga omukuluntu, Peter Mwatile, omukuluntu gwopolisi,Sebastian Ndeitunga nomukuluntu gwezulonkalo, Evaristus Shikongo kutya naya longe mbali lwaali opo ondungethaneko yUuministeli yomumvo 2009-2014 yi tulwe miilonga.Iyambo noshowo Ndeitunga oya pupula opolisi kombunda molwa iilonga iiwanawa ye yi longo pethimbo lyehogololo omumvo gwayi.Iyambo okwa ti opolisi oya sindana mokusoshimpwiyu kutya egameno lyoshilongo olya kalekwapo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
