Evaristus a yapulilwa Uupristeri ku Mbiishofa Nashenda

OMUMATI omugundjuka gwoomvula omilongondatu gwomomukunda Okaleke mUukwambi mOshitopolwa sha Musati Evaristus Hinanane, meti 16 Januari 2010 okwa yapulilwa Uupristeri kOmumbiishofi Omukuluntu gwOngeleka ya Katoolika ka Roma moNamibia Omusimanekwa Liborius Ndumbukuti Nashenda, sha ningilwa pOngeleka ya Katoolika ka Roma pOshikuku.

Oshituthiyapulo sha Pata Evaristus shika, osha li sha kalwa kOopata oyendji ya za kOmagongalo gi ili nogi ili moshilongo ashihe ngashi Opuwo, Nyangana, Khorixas, Aminuis, Omuthiyagwiipundi, Okatana,Anamulenge, Tsumeb, Windhoek, Otjiwarongo, mOshikuku nosho tuu, mewiliko lya Pata Werner Afunde ngoka e li Pata Omukuluntu Omukalelipo gwOmumbiishofi Omukuluntu na Pata Omukuluntu gwOshitopolwa shoka sha kala hashi ithanwa Owambo Pata Jose, Ooseesita, Oobruta, Aadiakoni yOmagongalo gi ili nogi ili, aendithi yomagongalo gi ili nogi ili aamati mboka tayi ilongele Uupata/Uupristeri oyendji lela,ookatekete noshowo nee aakwanegongalo lya Katoolika ka Roma mwa kwatelwa nee Aawiliki yOpapolotika, taya kwatelwa komeho ku Kaansela gwOshikandjohogololo sha Etayi tate Bernadinus Shikongo, aawiliki yalwe yOpambepo naamboka yOpamuthigululwakalo ya za koombinga noombinga dhoshitopolwa.Meme na tate Omuputudhi gwa Pata Evaristus, aamwayina, aakwanezimo, aamukunda nookuume ka Evaristus nayo opo ya li mpoka nokutala nenyanyu sho ta yapulilwa uupristeri.Pethimbo ta ningi Euvitho lyOshituthi, Pata gwa Katana Lukas Mosmedes, okwa lombwele Pata omupe Evaristus, ngoka e li Pata omuti 56 gwOngeleka ya Katoolika ka Roma moNamibia, kutya a kale omudhiginini meithano lye, Omugalikani, Omuvuliki nokwiilongekidhila omashongo tage ke mu adha mondjila yiilonga ye yuupristeri, ano yokuuvithila oshigwana shaKalunga Elaka etoye, lyombili nolyohole.Vicar General Afunde, moshipopiwa she pehala lyOmumbiishofi Omukuluntukuluntu Nashenda, okwa ti Ongeleka ya Katoolika ka Roma moNamibia oyi li tayi humu komeho tayi endelele oomvula ndhika molwashoka aamati aagundjuka yOngeleka ndjika oye li po taya itaale kewi tali ya ithana ya kuthe ombinga meithano lyUupristeri. Pata Afunde ta ti kutya pethimbo ndika Ongeleka ya Katoolika oyi na Oopata Aapopi yOshiwambo ye li 12 omanga Oshikandjongeleka oshinene ashihe sha Venduka shi na Oopata 56 lwaampoka. Afunde ta uvanekele Aakwanegongalo ya li mpoka kumwe nOmumbiishofi Omukuluntu Nashenda kutya mOseminali yUupata omu na aamati oyendji pethimbo ndika tayi ilongele Uupata nokwa tegelelwa kehe omvula ku kayapulwe Pata. ‘ Mbiishofi Omukuluntu, otatu ke ku pa iilonga. Okuza mpaka, kala wi ilongekidha kehe omvula okuyapula Pata omupe,’ Pata Afunde ta lombwele Omumbiishofi Omukuluntu Nashenda ngawo nokupandula aamati ayehe yOngeleka ya Katoolika ka Roma mboka ya tokola notaya ka tokola okukutha eithano lyUupristeri.Pata Afunde ta indile kAakewanegongalo ya kala nokuya mbidhidha Oopata nOombiishofi yawo.Meme gwa Pata Evaristus na tate omutekuli gwe, noshowo omukwanezimo meme Alvina, oya ti kutya omonamati gwawo oye mu gandja nomitima dha yela noye mu indile a ka longe nuudhiginini nokukala omunambili nomwiidhidhimiki, oshoka aantu oya nyenga Namwandi.Pata Evaristus okwa pandula Kalunga ke sho e mu enditha nawa sigo ta thiki mesiku lyEyapulo lye lyUupristeri ngeyi. Ta pandula aavali naakuluntu ye sho ye mu putudha nawa nokumwiilongitha nawa Osikola yopetameko sigo ta thiki ponkatu ye ndjika e li nena. Ta pandula, Omumbiishofi Omukuluntu nOopata ya ungaunga naye, unene tuu Aalongi ye kOsiminali nOmukuluntu gwayo, Pata nAakwanegongalo yokOshomeya hoka a kala tiidheulile noshowo nee ayeheyehe ya kala noku mu galikanena nenge oku mu kwathela meputudho nomeilongo lye.Omupristeri omupe Evaristus, okwa longwa Uupata mOseminali yUupata mo Klein Windhoek mOvenduka yedhina, Charles Lwanga oomvula heyali.Pata Afunde ta tseyitha kutya Pata omupe Evaristus, pa Mbiishofi Omukuluntu Nashenda, otaka kala manga pOshikuku sigo Pata Omukuluntu gwa Shikuku ,Willem Eita, ngoka e li keilongo lye pethimbo ndika, ta galukile kOshikuku, na opo ihe Omumbiishofi ta ka tala kutya pata nguka omupe Evaristus ote ke mu tumina peni. Oopata kaya hogolola hoka ya hala ya ka longele, ohaya tumwa ko kOmumbiishofi Omukuluntu.Omumbiishofi Omukuluntu Nashenda ngoka oye Pata gwotango Omupopi gwOshiwambo, okwa nyanyukwa sho ta mono ngeyi ooshilandula she. Ta ti aamati aagundjuka yOngeleka ya Katoolika mboka ya hala mUupata nayi ilopote ashike kuye nenge ku Pata Omukuluntu notaya tumwa ngeyi kOseminali. Omumbiishofi omukuluntu ta ti Omumati kehe ngoka a tokola okukutha eithano lyUupristeri, shampa ashike a pita Ograde 12 niitsa 20 okuuka pombanda ota vulu okutaambwa mOseminali yUupata.