Eva-Liisa, Duline na Nicodemus otaya fumvikwa ngula pEkamba

AAKALIMO yatatu yomomukunda Olulongo mUukwambi mOshitopolwa sha Shana, Eva-Liisa Shiinda, Duline Shiinda (gwoomvula 35 lwaampoka) na Nicodemus Frans Shiinda gwoomvula 26,mboka ya manene oondjenda dhawo ombaadhilila mEtitano lya zi ko sho okahauto kokatuukara moka ya li mo kiidhenge mumwe nohauto yobakkie lwopOnampila mondjila ya Shakati na Shikuku, otaya fumvikwa ngula pEkamba mUukwambi okuzilila mOngeleka yawo ya Kamba ELCIN.

Oshituthidhimbuluko shawo tashi kala ko komatango gonena pegumbo lya tate Errki Akawa Shiinda pOlulongo mpoka.
Moshiponga shoka omwa sila wo omukwashigwana gumwe gwomukiintu, taku tiwa kutya oye meme Victoria Bormeus gwoomvula 36 lwaampoka, a zile kombinga ya Gongo mUukwambi mOshitopolwa sha Musati.
Inatu uva ko oshindji kombinga ya nakusa meme Victoria.
Nakusa Nicodemus opo a hulithila poshiponga mpoka, omanga meme Eva-Liisa, meme Duline na meme Victoria ya ka hulithila koshipangelo shEpangelo sha Shakati.