Eutho lyoquorumu ta li lundululwa

OSHIGONGI shOpashigwana osha dhiladhila okulundulula eutho ndyoka ta li utha kutya megumbo lyokutota oompango omu na okukala aluhe aatotimpango omilongo ndatu nayaheyali (37) mboka ye na uuthemba woku ninga omatokolo opo ashike oonkundathana dhi ye komeho.

Elundululo ndika opo li ningwe shika ota shi pula okulundulula oshitopolwa shika mekotampango lya Namibia.Ominista yOonakulwa Aakulu omundohotola,Ngarikutuke Tjiriange okwa tseyitha metine kutya ota ka gandja osheetwa po shika megumbo ndyoka oshiwike shika.Oshiwike shiya sha ziko metine, oshigongi shika, kasha li naatotimpango momwaalu gwa gwana gwaamboka ye na oonkondo oku ninga omatokolo. Ekuutumbo ndika olya li etitatu konima sho aatotimpango ya galuka mefudho lyuule woomwedhi mbali.Kuyele nuumvo aatotimpango oya li woo ye na oku tumwa komagumbo shaashi kaya li po momwaalu gwagwana, molwaashoka yamwe oya kala inaa ya galukila kiilonga konima yotee nenge yamwe oya ka longa iilonga yawo yopaumwene.Pantokolwa 53 yekotampango aatotimpango 37 oye na oku kala megumbo , kakele komupopi gwegumbo opo oonkundathana dhi tsikile.Elundululo ndyoka Tjiriange a hala okweeta megumbo olyo ndyoka kutya pukale aatotimpango 37 megumbo uuna ndoka egumbo ta li hogolola moku ninga etokolo.Omanga ngele aantu otaa ningi oonkundathana nena aatotimpango mboka ye na uuthemba wokuhogolola ota ya vulu okukala moshigongi.Ethaneko ndika, lyokulundulula ekotampango ota li kala etitatu oku za kemanguluko.Elundululo lyotango olya li mo 1998 sho omusamane, Hage Geingob a etele elundululo ndyoka lya pele omusamane, Sam Nujoma oshikako oshititatu mepangelo.Omanga elundululo etiyali oondyoka lyo nuumvo lyo ku lundulula ethimbo lyokukala mombelewa kwaaleli yiikandjohogololo naamboka yoodoolopa ku kale oomvula ntano, ndele ka dhi shi hamano ngaashi shi li ethimbo ndi.