Etwikilo leemhata dongaba yopokati kOndonga nOukwanyama

Elelo lOpamifyuululwakalo laUkwanyama ola kundana, natango tuu, onghundana ikenyeneka tai popi kombinga yelalakano olo lihe fi liwa lElelo lopamifyuululwakalo laNdonga (olo metwililo tali ka ifanwa oohailwa Ovandonga ile oohailwa ,ile, ovatalelipo) melalakano lalo lokutamununa mo Ondonga mokutauluka ongaba yopokati ka Ndonga naUkwanyama.

Pefimbo tuu eli oohailwa ova notelwa okukwata ko omukunda wOmana oo okudja nalenale wa kala wElelo laUkwanyama. Olweefo nee eli lopaife olo etivali momudo ou okuuya tuu nelalakano olo kOmana. Ovakalimo vomOmana ova lopota oshinima eshi kOpolifi nosho yo kElelo laUkwanyama.Meendelelo elelo laUkwanyama ola ifana oshiongi showina oko yo la ifana ovakalimo vomOmana veuye va lopote ombaxu-nokavava koshininingwanima. Olopota oyo nee ei:Meti 14 laKotoba 2009 Ovamana ova nofwelwa ko kutya oohailwa otava longekida etalelopo lokavakela tali uya kOmana, ve na edilaadilo lokunangeka omuleli wavo wopamifyuululwakalo monhele oyo tuu oyo. Meti 17 lomwedi tuu oo, oohailwa ove uya shili mOmana ve na oihauto ihetatu (8) ya humbata ovanhu oikombo yomafona neendjebo. Diva ponhele opo opa holoka eengudu mbali momiti mbali da yooloka : ongudu yovatalelipo nongudu yOvamana: ovatalelipo ova kala nee nokuifana Ovamana va ye komuti wavo opo ve va lombwele edilaadilo letalelopo lavo osho nee, Ovamana ve shi anya okadaadaa. Kapatashu komOmana okwa pula oohailwa Ovandonga ngeenge Elelo laUkwamnyama oli shi oweenda wavo oo. Oohailwa ova ti ova ti halelo laUkwanyama alike la li la shiivifilwa ndele nee omuleli wEpangelo (Kaansela) nosho yo Opolifi ove va shiivifila yo, ashike eshi kasha li nee shoshili. Kapatashu opo nee a tya: hano Ovamana ova teelela nee oshiendo shovatumwa vElelo lauKwanyama shi fike, ovo tave uya va lombwele Ovamana osho ve na okuninga moshinima?Ovatalelipo ovahelula nokuli efona lotete mbela ve li dipae vo va hovele okutyapula enangeko lomuleli wavo ou ve uya okunangeka mOmana . Pefimbo tuu opo, opolifi yaNamibia oya fika ponhele opo nokomima oya ka lombwela ovatalelipo vafiye po onhele. Oohailwa nova fiya po onhele, ndele tava i.Konima yaashi omuyandjimulombo omulineekelwa okwa lombwela Ovamana kutya oohailwa ove ile nelalakano lela lokunangeka omuleli wavo wopamufyuululwakalo mOmana vo ova li nokuli tava ulike komapya oo eli opo, omo va li ve na okunangeka omuleli wavo oo tava diladila. Menota lavo ladiinima lokutamununa mo Ondonga oohailwa ove na nee elalakano va tendele kOndonga eenhele dimwe odo da kala nalenale dokOukwanyama.Ovakwanyama ava va ama ondjila/ ongalama oyo: Kavango, Onuno ve i ama kOndonga ohava lombwelwa kalupu koohailwa Ovandonga kutya nava hovele oku ka fendela kElelo laNdonga. Enota eli loohailwa ota li monika yo moitya yavo ngaashi, ‘Nava shune (ovakwanyama) kOihole kwi! Oihole oyo onhele i li muAngola, muyo mwa lwila Ohamba Mandume yaNdemufayo molwoodi eshi a li ta lwifa Ovakolonyeki. Osho tashi linyenge mOmana paife okayulu ashike sha etako.Ovanamibia aveshe ava va kala veli konooli yOshivelo taku wedwa Ovaherero kombinga yOshivelo sha Namutuni, okuAngola va dile eshi ve uya mwaasho tashi ifanwa nena Namibia ova dile keenhele tadi ifanwa Ehanda nOhumbe di li fiyo onena muAngola. Hano omunhu keshe womomihoko da tumbulwa ngeenge oku udite kuAngola oku na okushunwa, na shune ashike puhe na omaongaongo. Ine shi talela kuvakwao shaashi naye mwene oko a dile.Onghalo ei yokulidengifwa omitwe kumwe kape na malimbililo, oi na enwefemo lOpapolotika naau nee ei li konima oye omuhongaifi omunapolotika ou e na elalakano lokuteyaula nokuhanaunapo oukumwe nombili oyo ya kala tai pangele pokati kOvandonga nOvakwanyama. Eshi osho exwaxwameko lomulandu oo tau ti; Nombili oyo hai uhala tai popiwa nokupopyululwa kovaleli vetu, ohai dulu tuu i kale i na oukaume nelongifo lekuni?Otu na yo elipulo kutya, oohailwa Ovandonga mbela vo inava mona yo ombilive yaMinista Jerry Ekandjo, oyo yomo 23 Juni 2009, oyo fye twa mona noi na etumwalaka eli kutya, ye okwa tumwa kOmufimanekwa Presidende e tu lombwele kutya oshinima shomukundu weengaba pokati kOndonga nOukwanYama oshe lineekelelwa paife omutumba wOvaleli vopamifyuululwakalo moNamibia (Council of Traditional leaders). Eshi osha eta po nee onghalo yoshinima tashi mwenenwa manga ku teelelwe oidjemo yoKaansela yo. Ngeenge ova mona yo ombapila oyo opo va twikile noimima yeengamba, otashi ti ova dina mbela oshikalimo shoomombapila oyo?Oiningwanima ei ivali, shomo 7-9 Kotoba 2004, nosho mo 17 Kotoba2009 otai ulike efaafano lakula. Aishe oya tukululwa pefimbo lomahoololo a twima ko moshilongo shetu. Epulo otali uya: ‘ Olye e li konima yetukuluko loiningwanima ei? Elalakano laye olo okunyona omhepo iwa momahoololo, ile oshike? Oye mwene e shii edilaadilo laye, ashike omatukuluko a tya ngaha itaa ulike omalalakano mawa.Omakanghameno Elelo lopamifyuululwakalo lOukwanyama okwe likwatelela ashike keengaba odo dotete da tulilwe po kovakulu vonale vomalelo etu atatu: Ovandonga, Ovakwangari nOvakwanyama, ovo veshiivike nawa nova li ve na omadilaadilo angungila.Eengaba osho ve di tula ngaho, osho da kala ngaho nefimbo olo alishe la pita, ovanhu vomihoko detu adishe odo nhatu ova kala va mbilipalelwa keengaba odo tuu odo nova kala ngaha nombili pokati kavo.Eitavelafano lomu 14 Malitsa 2004 olo la li la ufwa kOmupresidende Omukokoli woRepublika ya Namibia, olo la li nelalakano okulundulula eengaba edi, ola li la fininikilwa ovanhu onghee ina li tambulwa kElelo lopamifyuululwakalo loUkwanyama.mOshinima natango tuu sheengaba edi Elelo lAukwanyama ola kulama/kanghama, opo li teelele oidjemo yoinyangadalwa mekwatafano tuu eli. Oshinima sheengaba edi osha yandjwa kOmupresdidende woshilongo nashoyo kOmukokolipresidende shi ungaungwe nasho kOmutumba wOmalelo opamifyuululwakalo moNamibia. Otwe lineekela notwa teelela oidjemo i ka kale ya ningwa momhepo iwa nopauyuki.Ohatu pandula nefimaneko ovakalimo vomOmana ovo va longifa elididimiko lakula nove lihumbata nawa momashongo manene ve a ningilwa. Natango moshinima eshi, ohatu fimaneke nepandulo linene Opolifi ya Namibia eshi ya kaleka po oveta nelandulafano.