Etuntilo ta li ningwa sho okakwenyene ka gee moHangwena

OSHITOPOLWA sha Hangwena ota shi ka ninga etuntilo omolwa okakwenyene oshiwike shika.

Etokolo ndika olya ningwa molwaashoka aantu mboka ya pangwa omolwa okakwenyene ngashingeyi oya yi sigo opo mwaalu gu li pombanda lela.Etuntilo ndika ta li shoneke aanona ye li pokati kuukokele woomwedhi hamano sigo oomvula ntano ota li tameke mo 16 ga Septemba 2009 nenge tu tye metitatu sigo omo 18 ga Septemba 2009.Oshitopolwa osha koleke kutya iiningwanima yokakwenyene omi 35 oya ndhindhilikwa oku ziilila momikunda ndhoka dha kundukidha omudhingoloko gwEngela. Omiyalu dhaamboka ya gumwa kuuvu mbuka odha kwatelamo aaNamibia 19,naAngola yeli 15.Pashilongo ashihe aantu 38 oya monika uuvu mbuka pa makonakono golaboratorium.Sho uuvu mbuka wa li wa kolekwa tango momudhingoloko gwEngela pehulilo lya Juli, aanuuvu oyendji oya li aakwashigwana yaAngola.Ongundu yo NHEMC oya fatulula kutya omukuthi nguka ogwa li tagu zi moprovensie ya Cunene muAngola moka omukithi nguka gwa li gwa holoka maantu oyendji.Ndele ngashingeyi sho aavu oyendji mboka ye na oshikwenye ye li AaNamibia shika ota shi ulike kutya uuvu woshikwenyene ota u taandele woo maakwashigwana ya Namibia.Pahokololo lyongashingeyi oku za moAngola ota li ti aantu 300 oya monika okakwenyene pokati ka Mai na 8 ga Septemba 2009 moshitopolwa sha Cunene moAngola, kuumbangalantu ashike woshitopolwa shaHangwena.Omiyalu odha tegelelwa dhi ye pombanda molwaashoka aavu mbaka 300 oomboka ya pangwa sho ya talelepo iipangelo miilando.Iiningwanima 65 ta ku fekelwa yokakwenyene ota yi konakonwa natango momudhingoloko gwEngela.Omi 33 yomumbika oyo aavu Aangola, nomi 31 aavu AaNamibia.Mokati kaambaka aavu 32 oye li kombanda yomimvo 15 omanga 12 ye li kohi yuukuluntu woomwedhi omugoyi. Shika oshinima ta shi tilitha molwaashoka ota shi ulike aantu kaayena etuntilo molwa okakwenyene, na shika otashi vulika sheete uudhigu uunene.Omukuluntu ta alukwa oshikwenye ota vulu oku adhika koshimela, kopneumonia, konzindo yokuuluyi, komeho gatiligana, nenge nookuli uuposi.Oshikwenye osho uuvu hau kwata iilyo yomufudho, no ha u etwa kovirusa.Omandhindhiliko goshikwenye ogo olwiidhi ta lu endelele, omukolo, omanino, omeho ga tiligana, okupuluka nuupulu uushuushuka ha u tameke moshipala nothingo sigo wiihanene olutu aluhe.Oha u taandelekwa kokukolola,okwi ipemba nenge oku kala mekwatathano niikunguluki yomunuuvu ya za momayulu nenge mokana.Aanambelewa yuukalinawa moHangwena oya gandja nale ondunge dhiladhilo yawo kongundu yoNHEMC ndjoka ta yi popi shi na sha nokuhwahwameka oshigwana kombinga yoshikwenyene, noshowo kombinga yoshikonga shomatuntilo.Oshitopolwa osha ti woo oshi na elalakano okutuntila aanona pomahala ngoka ga li inaga adhika komatuntilo ngoka haga ningwa omvula kehe noshowo mpoka omatuntilo ga li inaga thika po naanaa poopelesenda 95.Opo oshitopolwa shi adhe elalakano lyasho osha indile eyambidhidho molupe lwaaniilonga , mwa kwatelwa naapangi, aaiyambi noshowo aakwatelikomeho.Ominista Yuukalinawa omundohotola Richard Kamwi okwa ti elongo lyaapangi noondohotola kombinga yokupanga okakwenyene olya ningwa nale noshowo elongo lyoshinamumwe lyo ku kala kwa tonatiwa kombinga yomukithi kehe otaku ende nokutsikila.Naashika ota shi kwatelemo oondohotola naapangi miipangelo yepangelo naambyoka yopaumwene.Okwa indile kaakuluntu nokaatekuli yaanona mboka ye li kohi yoomvula ntano, opo ya se oshimpwiyu kutya mbaka oya tuntilwa ngaashi shi na oku kala.