Etuntilo lyokakwenyene lya tameke mo Khomas

UUMINISTELI Wuukalinawa owa tameke etuntilo moshitopolwa sha Khomas metitatu.

Etuntilo ota li ningwa opo pu kondjithwe oshikwenyene shoka shi li moshitopolwa shika, onkene aakuluntu mboka ye na aanona oku za poomwedhi hamano sigo oomwedhi 59 oye na oku fala aanona mbaka kuupangelo nenge komahala mpoka pena aapangi ta ya tuntile aanona mbaka.Uuvu mbuka owa holoka moshilongo oomwedhi dha ziko, nowa dhipaga nale aantu ye li 12.Omundohotola Jack Vries okwa lombwele oThe Namibian kutya sigo oompaka iiningwanima yomukithi nguka ya tseyithwa oyili 725 moshilongo ashihe omanga omayamukulo giiningwanima 112 oga tegelelwa oku za koolaboratorium.Omukithi nguka gwomukwayu ogwa tseyithilwe tango nuumvo moshitopolwa sha Hangwena, momudhingoloko gwEngela lwopehulilo lyomwedhi gwa Juli, konima sho uuvu mbuka wa li wa holoka moAngola.Omatuntilo oga li ga ningwa moshitopolwa shika muSeptemba okungambeka etaandelo lyoshikwenyene, onkene ekalepo lyoshikwenyene moshitopolwa sha Khomas unene moVenduka ota li kumitha.Vries okwa ti omahala gokutuntila ge li 37 oga tulwa po puupangelo uushona noshowo palwe moshitopolwa sha Khomas netuntilo ota li kala po sigo ometitano.’Aakuluntu naya fale aanona, kutya nee mbaka oya li ya tuntilwa nale, kutya nee mbaka oye na uukalata woshipangelo nenge ahawe,’omundohotola Vries ta ti, sho a ulike uuwanawa nesimano lyetuntilo ndikaOkwa ti ngele osha pumbiwa etuntilo ota li lelepekwa opo omunona kehe a tuntilwe.Oshikwenyene osho uuvu ha u kwata iilyo yomufudho.Omandhindhiliko ga wo ogo epupyalo, omukolo, omanino, omeho ga tiligana, uupulu uushona mboka ha u halakana nolutu aluhe.Oha u indjipalekwa mokukolola, nokuteshima,noshowo okukala mekwatathano lyiikunguluki yomuntu ngoka ena uuvu mboka.