Etungo lyakulupa lyohotela mOkahandja lya eta eso lya gumwe.

E
TUNGO lyohotela yomOkahandja, ndyoka lya ningi omathimbo ihaa li longithwa olya etitha eso lyomuntu gumwe moshilando shoka metitatu.

Omweendi koompadhi gumwe okwa dhengwa kiipambu yiitenda mbyoka ya gu ketungo ndyoka metitatu.Omunangeshefa gwomOkahandja ngoka a popi noThe Namibian okwa ti aakalimo yomOkahandja oya kala noku nyenyeta kombinga yetungo ndika kutya olya nika oshiponga kuyo unene ngele ta ya ende mpoka.Etungo ndika lya li lyohotela mOkahandja mepandaanda enene lyoshilando shika olya, holola kutya olyo oshiponga kaakalimo sho omukiintu gumwe a kanitha omwenyo gwe sho a dhengwa kiipeleki mbyoka ya gu ketungo olyo tuu ndika. Iitenda mbika oya gu ketungo sho ya pepwako kombepo omutenya gwetitatu.Nakusa okwa tseyithwa oye Maria Nekongo (53), omukalimo gwomOkahandja a li ha longo mombelewa ya kansela gwoshikandjohogololo sha Kahandja. Shika osha kolekwa komunambelewa omukuluntu gwoshilando shoka, Regina Alugodhi.Alugodhi okwa ti eso lya Nekongo ‘olye tu nikitha oluhodhi ongo ewiliko lyoshilando nongo oshigwana shomoshilando.’Okwa ti ombepo ondhigu oya kutha ko iipeleki yimwe kondunda yohotela ndjika pethimbo lyomwiha.Nekongo okwa li popepi netungo ndika sho ombepo onkwawo ya pepe noku gwitha ko iipeleki iikwawo mbyoka ya li ya yula ko ketungo, mbika oya dhenge Nekongo momutse nokwa si.Alugodhi okwa ti ina taamba omanyenyeto pambapila kombinga yetungo ndika, unene tuu kutya olya nika oshiponga kaakalimo.Okwa ti etungo olya kala miikaha yUuministeli wAagundjuka uule woomvula ndatu dha piti po, mboka wa li wiipyakidhila noku li opaleka li ninge ehala lyokulongelwa iinima oyindji kaagundjuka.