Banner Left

Etungo laChicco olo lihe na ovanhu otwe li futa ashike eemiliyona N$2.1 – oministili yovanyasha

OMUKULUNHUWILIKI woministili yomaudano, ovanyasha nomayakulo oshiwana Erastus Haitengela, okwa ti epangelo ola futa ashike eemiliyona N$2.1 opo lihiila yetungo leembelewa mOvenduka inai i longifa.

Haitenge eshi okwe shi popya ta nyamukula kehokololo kwa li la shangwa moThe Namibian Etitatu olo la lopota kutya epangelo ola shaina okufuta oshimaliwa shi fikepomiliyona imwe oshinghwanyu imwe keshe komwedi opo li hiile etungo li li modoolopa lomunangeshefa Erastus ‘Chicco’ Shapumba.

Odula ya dja ko, Haitengela okwa ti epangelo okwa li tali futu oshimaliwa shi fikepoN$450 000komwedi.

Paife, ota ti kutya epangelo ola futa ashike eemiliyona N$2.1 muJanuali 2025. Haitengela Etitau okwa nukilapomutenya kutya ina tya nande otava kala tava futu oshimaliwa shi fikepoN$450 000 odula ya dja ko.

“MuJanuali 2025, ovanhu ovo va ninga eudafano eli ova koleka kutya etungo oli li pokupwa. Onghee nee, momafiku 07 Januali, oministili yoilonga noyeendifo, kwa li ya kalela po oministili yetu, okwa li ya futa ko manga oshimnaliwa shi fike poN$2 128 500,”
Haitengela osho a ti ngaho momukanda.

Okwa ti eshi osho ashike oshimaliwa sh futwa ko fiyo opapa pokati kepangelo namwene wetungo.

Eudafano olola shainwa muDesemba 2023 ola ti, epangelo okwa li la pulwa li fute oshimaliwa shi fikepomiliyona imwe oshinghwanyu imwe keshe komwedi tali futu kehangano ledina City Place and Property Managment Pty, ehangano laShapumba.

Eudafano, olo la tameka muApilili 2024, okwa li la shainwa kuShapumba nomukulunhuwiliki woministili yoilonga noyeendifo Esther Kaapanda momafiku 13 no14 Desmba 2023. Ashike nee, eemwedi omulongo konima yeudafano la shainwa, oministili yovanyasha natango inai ya mo metungo omo.
Haitengela okwa ti yee haye nande a shaina eudafano eli, noshikumungu shetungo osha tameka omanga kwa li ehe li moministili omu.

OTAMU IWA MUMARSA
Haitengela okwa ti eemiliyona N$2.1 odo da futwa oda koleka ashike eudafano, osho tashi pe oministili yovanyasha oufemba opo i twikile nomafaneko etembu melongelokumwe noministili yoilonga noyeendifo.

“Shaashi etungo olipe opo la tungwa noli na eefulula natu, ola tamekwa nale okutopolwa nokuluta mo oinima oyo ya pumbiwa muJanuali 2025. shimwe vali oshimaliwa, omafano okutyuna mo nawa etungo eli okwa li nale a manifwa muAuguste 2024, manga etungo inali pwa,” Osho a ti ngaho.

Okwa ti oilonga aishe ei oya teelelika i kale ya pwa pexulilo laFebuluali 2025, nokuya mo mulotete laMarsa.

“Osha fimana okuyeleka kutya oministili yoilonga noyeendifo oyo i na oshinakuwanifa shokukonga eembelewa nokuwilika omaudafano eehiila eeministili adishe depangelo, pakulongela kumwe noministili oyo ya hala okulongifa eembelewa odo,” Osho a ti ngaho.

Paife, oministili yovanyasha ohai longele peenhele mbali: Meembelewa doministili yehongo lopombada nomeembelewa dehangano ledina Namibia Industrial Development Agency (Nida).

Ashike nee, oministili yehongo lopombada oya pula pambelewa oministili yovanyasha opo i kale ya dja mo meembelewa dayo i dule okutula mo ovanailonga yavo.

Molwomumbwe yakula yeembelewa ei, Haitengela okwa ti oministili yaye oya itavela okutembukila koERF 126, Independence Venue, opo i dule okulonga nawa nokushonopeka oimaliwa yohiila oyo hai longifa okufuta eembelewa da yooloka.

“Pefimbo lokushaina, etungo natango okwa li tali longwa neembinga adishe okwa li da itavela okuundulila komesho efiku lokondalaka.

Molwoshinima osho, kapu na nande oshimaliwa shohiila sha futwa pokati kaDesemba 2023 naDesemba 2024,” Osho a ti ngaho.
Haitengela okwa ti eshi she va kateka okutopola peefulula dimwe opo inapu pwa.

“Omanga oministili inai ya mo natango filufilu metungo, oya mona oufemba wokuya metungo omo,” Osho a ti ngaho.
Okwa weda po “okweendelelifa etembu, koshi yewiliko loministili yoilonga noyeendifo, oministili yetu oya tameka okutulifamo oinima aishe oyo ya pumbiwa.”

ENGWANGWANO
Ashike nande ongaho, omukanda waHaitengela itau tu kumwe nomauyelele akwao oo e li po nale. MuMei 2024, Haitengela okwa li a endululwa ta popi kutya okwa li tava futu oshimaliwa shi fike poN$450 000 komwedi, osho shi fike peemiliyona N$5.4 kodula.

“Omwaalu wohiila otau ka kala u dulife pwaau hatu futu Nida paife luvali. Eyooloko ole li kutya paife atushe katu li metungo laNida, ashike oku hatu i, ohatu ka kala pamwe,” Osho a ti ngaho odula ya dja ko. Shapumba Etitatu okwa lombwela oThe Namibian kutya ina mona nande oshimaliwa shi fike peemiliyona N$11.

“Inandi mona nale oshimaliwa shi fike peemiliyona N$11. Mutu opu na omunhu a patulula ombaanga yoimaliwa oyo.

Pekaapeka nawa ndee to pula ou a ti ove tu futa opo va mone kutya ova futa kombaanga ilipipo. Pukula oshinima osho,” Osho a ti ngaho.
Minista womaudano, ovanyasha nomayakulo opashiwana Agnes Tjongarero okwa ti okwe shi “uda” ashike.

“Onda uda kutya ohatu futu oshimaliwa ashike inatu ya mo. Ondi wete kutya nasho oshi li moikundaneki.

Onde shi uda ashike kandi shi ngee oshili aaye. Sha hala kutya ohatu futu ohiila yeembelewa mbali, yetungo omo tu li paife naali lihe na ovanhu?” Osho a pula ngaho.
Shapumba oku na ondjokonona yokumona eengeshefa da kilikita okudja komahangano epangelo.

Momudo 2013, ewiliko lodoolopa yaPuwo okwa li la landifa po okapale kepangelo kedina Katuta Standium kali pokati kondoolopa koshimaliwa shi fike pomiliyona imwe oshinghwanyu nhatu.

Momudo 2016, elelodoolopa laShakati okwa li la landifa po oerf 1342, kwa li i shiivike nawa kutya Omatala kuShapumba, keemiliyona ashike N$2.5 – omwaalu oo taku tiwa oushona neenghono.

Momudo 2023 oThe Namibian okwa li ya lopota kutya ehangano lepangelo ledina Agro-Marketing and Trade Agency (Amta) okwa li la futa oshimaliwa shi fike peemiliyona N$57 kuShapumba shi nasha neengeshefa mbali do kombinga yedu.

Imwe okwa li yoAmata i hiile etungo li li koWindhoek-northern industrial keemiliyona N$45.9, omanga oifuta imwe i fike lwopeemiliyona N$10.5 okwa li okuhiila onhele kOshikango.

Omakonakono okoAmta okwa mona kutya ehangano lepangelo inali ninga omakonakono a wana po etungo olo li li mOvenduka, nedu olo li li kOshikango kakwa li li na omikanda.

Odula ya dja ko, oThe Namibian okwa li ya lopota kutya minista weedoolopa noitopolwa yokomikunda Erastus Uutoni vati okwa dimina Shapumba a lande po edu lokOshakati longushu yeemiliyona N$30 keemiliyona di li ashike N$8.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News