Etseyitho lya simana koshigwana

OMUNAMBELEWA Omugandji gwomauyelele mOshikondo shOondjila (Road Authority), Hileni Fillemon, ota ti kutya okuza mOmaandaha geti 19 Maalitsa 2012, Omaindilo goombapila dhokwiilonga okuhinga nokuhinga, otaga kala haga ningwa okuza Omaandaha sigo Etitano okutameka pohetatu (08H00) yongula sigo opetata lyone (15H30) yokomatango, ashike nee mOmatitatu, okuza pomugoyi gwongula gwa pititha oominute omulongonantano (09H15 sigo opetata lyone (15H30) yokomatango.

Shika oshi na sha ashike nombelewa ya NaTIS Valley Driver Testing Centre moWindhoek. Otashi vulika ku ka gwedhelwe natango ethimbo nenge omathimbo momasiku ga tumbulwa kakele komOmatitatu. Shika otashi ka indjipaleka oonakuninga omaindilo goolisenisa dhOkwiilonga okuhinga ya kale ye li 168 mesiku, unene tuu okuza momaandaha sigo omOmatine naantu ye li 126 mOmatitatu, omanga mboka yokuninga omaindilo goolisenisa dhokuhinga taya ka kala ya indjipala naantu 45.Shoka sha tegelelwa shi ningwe ku nakwiindila ombapila ye yokwiilonga okuhinga nenge yokuhinga osho shika kutya omuntu oye mwene ne ye a ninge eindilo. Ta etelele ombapila yuukwatya we ya kwashilipalekwa kopolisi, ngashi unene opasporta nenge onzapo yevalo. Na kale i ilongekidha okukonaakonwa omeho noshowo okufuta iifutwa po yooN$45 yombapila yokwiilonga okuhinga noshowo N$110 yombapila yokuhinga. Shampa ashike omwiindila a udhitha ofooloma ye nena ota lombwela kutya otaka konaakonwa uunake. Ngoka we ya tango ongoye ngaa to ka yakulwa tango.