Etopoko mo NUNW ta li nkundipaleke aaniilonga

ETOPOKO mehangano lya National Union of Namibian Workers[NUNW] ota shi vulika li nkundipaleke ehangano ndika noshowo aaniilonga yoyene, pahapu dhomunawino miinima yaaniilonga, Herbert Jauch.

Ondundahangano yaaniilonga ndjika oya li noshigongi shongundu pitithi ehuliloshiwike, shoka sha ulike kutya opena okwaa tsa kumwe mokati kaawiliki yaaniilonga. Oshigongi osha ithanenwe shi kundathane onakuyiwa yAmushanga Ndjayi gwa NUNW, Evilastus Kaaronda, moshigongi moka omahangano gatatu iilyo ya NUNW oga zimo konima sho Alfred Angula a ulikwa a ninge amushangandjayi gwopevi. Aaniilonga oya li ya gandja omushangwa gwomanyenyeto koshigongo shoka taya pula omatokolo goKongressa ya NUNW ga ningilwe omumvogu, ga tulwe miilonga unene tu ndyoka lye kano lyiimaliwa okuza moshiketha shoopenzela dhepangelo GIPF.Aaniilonga oya indile woo ewilikongundu lya NUNW niilyo hangano yilwe ya ethe oku tidhagana Kaaronda. Aaniilonga oya ulike woo kutya ka yena einekelo lyasha mwaamushanga gwa Napwu, Petrus Nevonga. Omushangwa ogwa thaneke woo puningwe okongressa yopaulumompumbwe opo ndjika yi hogololele ewiliko epe lya NUNW.Ndele nando ongawo ha ayehe ya li ya nyanyukilwa omushangwa ngoka , ngaashi sha ulikwa ko National Teachers Union of Namibia, Nantu, ngoka a indile iilyo yehangano lye yaa shaine ombapila ndjoka oshoka ina yi pitila mondjila yomondjila. Jauch okwa londodha kutya endopo lyaawiliki oku longela kumwe ota li eta pu kale pwafa o NUNW yi li po ku halakanapo. Okwa ti muule wethimbo ehupi ke wete etokpoko ndyoka ta li kandulwapo mbala, omanga muule wethimbo ele komeho otashi vulika pa ningwe okongressa onkwawo mpoka ta pa ka hogololwa aawiliki aape. Jauch okwa thaneke kutya osha pumbiwa opo eutho lyiilyo iikulu li kuthwepo opo pa yandwe onkalo ndjoka ya li po sho iilyo iyali yomoParliamende ya li poshigongi omolwashoka yina uukwashilyo uukulu. Omuwilik nale gwaaniilonga, Ben Ulenga kombinga ye okwa ti oshinima kashi shi ekondjelo lyiipundi ndele osho okwaa kala noshinakugwanithwa momeho goshigwana. A ulike oshiholelwa a ti ngaashi aawiliki yaaniilonga ye li momawilikongundu gomahangano ,ndele ihaya hokololele iilyo yomahangano gaaniilonga shoka ta ya longo momawilikongundu ngoka molwa uuwanawa waaniilonga.Ulenga okwa ti omuwiliki gwoshili gwaaniilonga okwa pumbwa oku kala eshi ku hokolola shoka ta longo komeho goshigwana nenge giilyo yehangano ndyoka lye mu pa uuwiliki. Ulenga okwa ti ongundu yoSwapo oya li ishewe ya pumbwa oku ya puyelele kombinga yaampoka ya thikama moshinima ngaashi shoka shiimaliwa yopenzela yaaniilonga yomepangelo ta ku tiwa oya kana.Okwa ti oshinima shika osho sha tilitha aawiliki yaaniilonga oku tya sha, oshoka oya tila pamwe ota ya kondjitha ekankameno lyoSwapo moshinima shoka.Omanga omuwiliki nale gwa NUNW, Ranga Haikali okwa ti otashi etitha ohenda oshoka aaniilonga mbaka ota ya popi iinima kaa ye yi uvite yo, yaana uuyelele wa gwana, ta ya ulike ominwe ku yalwe yafa ye na ondjo, yo itaa ya vulu okugandja uumbangi mboka ta wu petha mboka ondjo. Okwa ti oshinima shika shiimaliwa yopenzela yaaniilonga yapiyaganekwa otashi vulu ashike oku kandulwapo uuna uuyelele wa gongelwa, kutya iimaliwa mbyoka ta yi popiwa oya pungulwa peni.