Etokolo moshipotha shomahogololo nena

ETOKOLO kombinga yoshipotha shomahogololo shoka sha etwa koongundu 9 komeho gompangu yopombanda ota li gandjwa nena.
Konima yokupulakena oompata moshipotha uule womasiku gaali, omupanguli peresidende, Petrus Damaseb okwa tseyithile ompangu ndjoka ya li yuudha aapulakeni kutya ye pamwe nomupanguli Collins Parker otaya gandja etokolo lyawo moshinima shika nena[etine] potundi 14h30.

Oongundu omugoyi RDP, DTA, RP, UDF,Nudo, CoD, APP, NDMC no DPN nookandidate dhadho dhopauperesidende odha indile ompangu yopombanda opo yi ekelehi omahogololo goshigongi shopashigwana nogopaupersidende ga ningilwe mo 27 sigo 28 ga Novemba 2009, oongundu odha ti ngele shika ina shi ningwa ompangu na yi gandje elombwelo kutya omawi momahogololo ngaka na ga yalululwe.Okommissi yomahogololo ya Namibia no Swapo ota ya kondjitha eindilo ndika.Mbaka yaali oya gandja omatompelo mompangu kutya eindilo lyoongundu ndhika omugoyi na li ekelwehi.Oongundu dhompilameno 9 otadhi ti aniwa pethimbo lyo mahogololo opwa li pena omavundakano noshowo etaaguluko lyompango yOmahogololo onkene ngaka naga kalekwe, po napa ningwe omahogololo gamwe omape.Mokuyamukula eindilo lyoongundu omugoyi omukalelipo gwopampango gwoSwapo, Ishmael Semenya okwa ulike oshitsa shoka oongundu ndhika dha dhimbwa po, kutya odha li dhi na okwiithana aahogololwa yeli 54 yoSwapo mboka ta ya ka kuutumba moshigongi shopashigwana, oshoka naambaka oyena mo sha moshipotha shika.Semenya okwa tsikile ta ti inashi gwana opo oongundu ndhika dhi ulike omapiyagano ngoka ga ningwa pethimbo lyomahogololo.Okwa ti oya li ye na okuulika kutya shika osha nwethamo iizemo yomahogololo, kutya ngaaka mboka ya hogololelwa moshigongi shopashigwana ina ya hogololwa nawa. Okwa ti shika oongundu ndhika odha ndopa okushi ninga.Semenya okwa ti kombinga yomahogololo gopauperesidende ngaka itaga kondjithwa oshoka oonakwiindila inaya gwanitha po shoka tashi pumbiwa kompango kutya oyena okugandja oshimaliwa shofuto yiilonga yopampango shina okukala nomushangi gwiipotha yompangu yopopmbanda, shika inashi gwanithwa po.Oshimaliwa shililepo ofuto molwiilonga yopampango osha gandjwa ashike kwaamushanga gwiipotha, meindilo ndyoka lyomahogololo goshigongi shopashigwana.Albert Strydom sho a yamukula, Semenya kombinga yoongundu omugoyi inaadhi ithana ookandindate 54 ndhoka dha hogololwa okuya koshigongi shopashigwana okwa ti, mbaka ina ya pulwa ya yamukule oshoka yo otaya yi moshigongi shopashigwana medhina lyoSwapo, yo oSwapo oya pulwa yi gandje eyamukulo kutya omolwashike omahogololo itaaga ekelwahi po pu ningwe galwe.Omaandaha omukalelipo gwopampango gwoongundu omugoyi , Reinhard Totemeyer okwa tile ompango yomahogololo otayi ti iizemo oyina okutsilikwa pondje yomahala gokuhogololela, na ompango ita yi pitika opo iizemo yi talululwe pomahala gokutalulula opo yi igidhwe ongiizemo ya hugunina.’Oshi li ngeyi kutya ompango yomahogololo ita yi popi sha kombinga yomahala gokutalulula iizemo’Totemeyer ta tsikile noompata.Okwa ti eendululo oha li ningilwa pehala lyokuhogololela.Totemeyer okwa lombwele ompangu kutya aanambelewa yoKommissi yomahogololo oya ndopa okutsilika iizemo yomahogololo pondje yomahal a 90 miikandjohogololo 41 moshilongo.’ Ndika etaaguluko enene, na olya kutha mo esimano momukalo aguhe gwomahogololo” osho a patana.Okwa lombwele ompangu kutya pomahala gamwe gokuhogololela oonomola dhaahogololi kadha li dha nyolwa kuuntokombapila womambo moka uumbapilahogololo wa kuthwa.Oongundu ndhika ota dhi ti aniwa odha mono uuntokombapila mbuka kaa una oonomola ndhoka wuli omayuvi 16 357.’Ndika olyo epuko enene no ta li vulu okweeta opo omahogololo ga fukilwe nenge ga gandje ompito yekengelelo.Totemeyer okwa ti iilonga ayihe oku za keshangitho lyaahogololi, engongepo lyembo lyomadhina gaa hogololi olya ningwa momukalo inaagu longekidhwa nawa, naashika osho tashi indilitha oongundu ndhika opo omahogololo ngaka ga ekelwehi po pu ningwe gamwe omape.Vincent Maleka ngoka a kalelapo Okommisisi yomahogololo okwa ti eindilo lyoongundu ndhika ina li ningwa mondjila oshoka olya ningwa omasiku 10 konima sho omasiku omilongo 30 ngoka ga uthwa kompango eindilo li ningwe ga piti nale. Omanga eindilo kombinga yomahogolo gopauperesidende olya fa ashike inaali ningwa.Okwa ti eindilo okukondjitha omahogololo goshigongi shopashigwana nalyo olya ningwa kwa toka, lya ningwa potundi 16h30 omanga ombelewa ndjoka ha yi shanga omaindilo hayi pata po 15h00 komatango esiku kehe lyiilonga.Kombinga yiizemo inaa yi tsilikwa pondje yomahala gokuhogololela, Maleka okwa ti Okommissi oyina omishangwa gano dhaanambelewa moka ta ya ti kutya iizemo oya li ya tsilikwa ngaashi ompango ta yi ti.Okwa ti nando nee iizemo kaya li ya tsilikwa pondje yomahala gokuhogololela, shika ka sha li sha nika oshiponga kombinga yehogololo. Oshoka ehalo lyaantu olya li lya yalulwa, naashika osho sha simana noshina, oshilonga.Kombinga yomambo ngoka oongundu ndhika dha ti inaga fa omakwawo mokuholoka, Maleka okwa ti shika ita shi etele oonakwiindila nando osha , oshoka omambo ngaka inaga longithwa.Meyamukulo lye Totemeyer okwa ti omapuko, omapiyagano, nokwaalonga nawa hoka kwa monika kwa taandela momahogololo agehe oko taku eta ompumbwe opo omahogololo agehe ga ekelwehi po pu ningwe omahogololo omape.