Etokolo miihokolola ya Ngatjizeko omu April 2013

ETOKOLO miihokolola ya Natangwe Ipinge Ngatjizeko ngoka ta lundilwa kutya okwa dhipaga yina moVenduka konyala omimvo hamano dha pitipo olya tegelelwa li ka gandjwe momasiku 18 April omumvo tuuka.

Ngatjizeko [33] okwa lombwelwa kutya ota kala natango oomwedhi ntano a tegelela mondholongo okuuva kutya ehulilo lyiihokolola ye ota li kakala lya tya ngiini. Okwa lombwelwa shika konima yemanitho lyoompata miihokolola ye omaandaha oshiwike shayi komeho gomupanguli, Nate Ndauendapo. Iihokolola ye oya tamekele mu Juni 2010.Ngatjizeko ota lundilwa kutya okwa dhipaga yina ngoka aadhika eli mopenzela okuza kiilonga ye pEgumbo lyepangelo momasiku 17 Desemba 2006. Iipinge okwa li a si sho a tsuwa ooshaho dhoombele dhili 39.Ngatjizeko okwa fatulula kutya ita tindi kutya oye adhipaga yina noshowo okwe mu tile nomeya ga fuluka. Okwa tsomuthindo kutya nando okwa longo ngaaka elalakano lye kalya li okumudhipaga, oshoka ye okwa li kee uvite nawa momadhiladhilo ethimbo a longo oshilonga shoka.Okwaa uva nawa komomutse huka okwa zi melongitho nayi lyiingangamithi uule wethimbo ele, onkene omolwa onkalo yatya ngaaka okwa li itaa vulu oku yoolola epuko lye ndyoka a longo. Ngatjizkeo okwa li woo iihokolola mo 20 Desemba 2006 neihokololo ndyoka olili oshitopolwa shuumbangi mboka wu li komeho gohofa. Meihokololo ndyoka nguka okwa li a ulike kutya okwa dhipaga yina oshoka okwa li uuvite nguka aniwa te mu logo.Omundohotola gwomomadhildhilo ngoka a konakona Ngatjizeko okwa lombwele ohofa kutya nguka yemwene ka li tee hama pamadhiladhilo kakele pethimbo lyedhipago okwa li a piyaganekwa kelongitho lyiinima yemweetele oshipilili momadhiladhilo. Okwa ti pethimbo nguka a dhipaga yina okwa li eshi shoka ta ningi, ndele shoka she mu thiminike ooshoka shosheentsi nenge shomuzimbi gwopamadhiladhilo. Ohofa oya li ya lombwelwa kutya pethimbo nguka a dhipaga yina eiyuvo lye oku yoolola uuwanawa nuuwinayi olya li lya shonopala Ngatjizeko okwa kala mondholongo okuza tuu nkene a kwatelwe esiku lya landula sho a dhipaga yina.