Ethikamopo lyopapolotika lyoRDP mOshitopolwa sha Shana

OSHILYO shOngundumutima shoRDP nOmupopiliiko gwowina gwOngundu ndjikamOshitopolwa sha Shana, omusamane Kornelius Mbangula okwa shangela omukanda gwe kOshifo shika, ta ti ngeyi:

‘Okuza sho ongundu yetu yoRDP ya totwa moshitopolwa shaShana nomoNamibia alihe omwe ya ombepo yelunduluko yopapoolotika. Kape na omalimbililo aantu oyendji oya kwatwa kohokwe nokehalo ewanawa okuninga iilyo naayambidhidhi yongundu ompe yoRDP, okuza koongundu dhilwe dhoopolotika. Sigo onena aantu oyendji otaya ningi iilyo yOngundu pakumona uukalata wuukwashilyo.
Oyendji otaye tu hokolele nkene taya gandja omayambidhidho gawo nonando inaya ndhindhikwa ongiilyo yOngundu. Tse mboka twa kala petameko lyokwiinekelelwa okunana Ongundu mOshitopolwa, otwa koneka nawa nkene Opolotika ya kala tayi lunduluka ne kwatathano noongundu dhilwe dhOpapolotika mOshitopolwa.Opwa li omathimbo gamwe aawiliki yamwe yoongundu dhilwe dhopapolotiika niilyo yadho yimwe yi na uudhigulela oku tu tala momeho noku tu galulila epopitho, ewi lyomokana.
Pethimbo ndika sigo oompaka onda hala oku shi eta nolupandu olunene nesimaneko sho pe na elunduluko enene momayihumbato gaantu oyendji. Ngashingeyi oto adha aantu yoongundu dha yooloka ye li pamwe ye na ombili taya yolo nokuningathana omashendjo. Shono tashi ti aantu ayehe, aawiliki niilyo yoongundu dha yooloka dhopapoloika ngashingeyi oya koka pawuveko lyEkotamampango lyoshilongo. Aantu otaya ulike ya putuka yo oya simaneka Ekotampango lyoshilongo nelandulathano. Shino otandi shi popi oku shi talela unene miilyo naayambidhidhi yetu yo RDP, noongundu dhilwe, mbo taa kambadhala okukaleka po ompumbwe nesimano lyeyooloko lyomadhilaadhilo.
Tse mboka hatu longo nokumonathana noshigwana otwa tseya shoka tashi inyenge moshitopolwa ashihe. Otwa ninga iigongi iishona niinene. Olundji ohatu nana yakwetu yoongundu dhilwe dhOpapolotika, sho ye hole oku tu ulikila omizalo dhoongundu dhawo nokuninga omandhindhiliko gokwiitsa omukumo, omukalo gokwiisaagela oonkondo nomukumo. Onkalo yomoshitopolwa shika sigo oompaka oyi shi okupandulwa.
Oshoka sigo ompaka inapu holoka iiningwanima iidhigu yomaluhindo gopapolotika. Shila omapandela ngaa omanene wala to mono ge li gatatu nenge gane kiihauto taga pepe meyimweneno. Ehokololo edhigu otwe ke li tsakaneka owala sho twa ka talele po oshitopolwa Omusati omvula ya zi ko 2008. Tse aakwaRDP okwa li tu shi otu li moshilongo shetu sha manguluka.
Sho twa yile tu ka ninge oshigonginkundathana shaagundjuka yo-RDP mOutapi, oko twa adha ombepo yokamukondapweyu. Itandi dhimbwa uuwehame wondhopi onene nde y dhengwa pokati kombunda mOutapi. Ote ti omuntu ngwiya shapo ondhopi okwe yi umba nomaako agehe oshoka oya ehama noonkondo. Ano sigo oompaka otandi pandula aawiliki mOshitopolwa noshowo iilyo yoRDP sho ye shi
okwiihumbata nawa.
Yakwetu, aantu kaya liwa ngonyama. Iho pandula nosi noongunga. Opolosi yaShana nayi pandulwe . Ondi hole sho opolisi yaShana hayi longo kayi na ombinga ndele nomukuluntu gwOpolisi kOvenduka na pandulwe.Ondi shi shi , ngaashi kIitopolwa yilwe oshowo mOshitopolwa shetu sha Shana, Oongeleka odhi shi okupndulwa. Omishangwa ndhoka dha piitithwa okulonga aantu ya kalathane nawa, osho wo okupopya sha ukilila kape na uunbanda o omapuko taga ningwa komuntu kehe, shika osha longa wo nawa moshitopolwa shetu.
Ngashingeyi sho twa taalela omahogololo, otandi ningi eyindilo kukehe omunamibia kutya inatu ninga iihakanwa yomayihumbato omawinayi opo tu kkaleke po shoka twa eta po sha kotha ondilo ombili nemanguluko lyoshilongo.Otandi dhimbulukwa sho nda li nda adhika kaantu yanwe itandi ya popi pethimbo lyoomahogololo gokoTobias Hainyeko omvula ya za ko (2008), aantu taa ti; ‘Omushi ngaa kutya otwe mu geela inamu ya nomahogololo; gomoTobias Hainyeko. Oshinima shono ina mu ke shi ninga we momahogololo tage ya.
Nani omwa hala mu ethele omeya mondunda. Kamu shi shi kutya tse otwa panda sho ta mu eta ethikitho pamwe lyoonkondo (balance of power) mepangelo nomoshigwana opo oshilongo shi lelwe nawa? Aantu mbaka oyoongundu dhilwe dhi ili.Epopyo ndyono otali tu longo sha.