Etheni omunashipundi gwetu: aaniilonga ya Scorpion

AANIILONGA pOmina ya Scorpion Zinc Mine po Rosh Pinah oya hala Ewiliko lyOmina li ekelehi oshipotha shoka lya ningila Omunashipundi gwObrancha yehangano lyawo.

Shika oya li ye shi popi pethimbo lyomaashinga ndjoka ya li ya ningi mOmaandaha goshiwike shika.
Omunashipundi gwObrancha yehangano lya Mineworks Union of Namibia pOmina ndjika, Michaelino Kadhikwa okwa ningilwa oshipotha shokudhina aahona ye noshokunyateka edhina lyOkampani.
Oshipotha shokudhina Okampani osha moshipopiwa shoka Kadhikwa a gandja kiikundaneki, moka a li a popi kutya opu na uulingilingi tau ningwa mokugandja oopelemeta dhokulonga mOkampani kaaniilonga yaakwiilonga.
Shoka shokunyateka edhina lyOkampani oshi na sha nomapopyo ga Kadhikwa ngoka a li a li umbile aahona y e sha li pokati kEwiliko lyOkampani naakalelipo ya MUNW.
Kadhikwa okwa tegelelwa nee a ka ningilwe omapulapulo kombinga yiipotha mbika muul wethimbo efupi. Mombapila yawo yomanyenyeto ndjoka aaniilonga ya gandja ku Menindjela gwa kwalukehi, Dave Bently, aaniilonga mbaka oya nyenyeta kutya Kadhikwa okwa ningilwa iipotha yiifundja, sha ningwa nelelakano okuthindila kongudhi aaniilonga.
Aaniilonga oya hala Menindjele gwOonzo dhOpantu gwa Scorpion Zinc Mine, Kobus Mathys, a tidhwa meendelelo.
Otaya ti kutya Maths oku li konima oshikonga shi li ompinge nAanamibia, shoka elalakano lyawo olyo okwiindila Aanamibia ye shi iilonga kaye pewa opoosa oonene mOkampani.
Aaniilonga ya Scorpion oya ti kutya otaya ka katuka onkatu (inayi popiwa kutya oya shike), ngele eindilo lyawo inali gwanithwa po.
Omugandjimulombo gwa Scorpion Zinc Mine, Eve Black, okwa li a popi konima yomaashinga ndjika kutya Okampani oya tala ko oshinima shika ong’oshinima shomenu.
Okwa ti omanyenyeto gaaniilonga oga kuthwa ko na otaga ka pewa mboka taya ka ungaunga nomapulapulo ga ga Kadhikwa.