Omwaalu weekamusela dokoikandjohoololo yaShikoto oda itave kutya omwaalu womalishangifo ovahoololi ou li pedu moshitopolwahoololo shaashi ovanhu ovo ve li momikunda itava dulu okweenda vaye ve ke lishangife.
Oshikoto osho shimwe shomoitopolwahoololo oyo i na omwaalu u li pedu wovanhu ve lishangifa va ka hoolole fiyo opapa.
Kamusela wokoshikandjohoololo shaNehale Lya Mpingana Joseph Shilongo okwa ti ovahoololi vahapu itava dulu okulishangifa, shaashi ohava di mokati komikunda omo muhe na eenhele domalishangifo.
“Otashi udifa nai okudidilika kutya omu na ovanhu vahapu moshitopolwahoolo ovo natango va pumbwa okulishangifa unene ngaa paife eshi efiku laxuuninwa li li popepi.
“Ashike nee, ovanhu vamwe otava nyenyeta kutya eenhele dokulishangifa odi li kokule unene, ashike osho inashi longifwa ongelipopilo lokukala ino lishangifa,” Osho a ti ngaho.
Shilongo okwa ti ombelewa yaye oya hala eenhele dihapu dokulishangifa moshikandjohoololo opo ku etwe omayakulo aa popi novanhu ovo ve li momikunda.
Kamusela wokoshikandjohoololo shaKankolo Hans Nambodi okwa ti oshikandjohoololo shaye osha kula novanhu vahapu ohava di mokati komikunda.
“Ovanhu vahapu otava fininikwa okweenda eendjila dile opo ve ke lishangife, ashike ovanhu ashike ovo ve na eenghono ovo tava dulu okweenda ashike ovo itava dulu okweenda inava kwatelwa mo.
“Otashi kala shi li xwepo ngee okomisi yomahoololo yaNamibia oya ningi eenhele dayo domalishangifo dihapu, unene ngaa moitopolwa yokomikunda. Omikunda odi li kokule, ndee ha keshe umwe ta dulu okweenda,” Osho a ti ngaho.
Okomisi yomahoololo oya ti, omwaalu vovanhu ovo ve lishangifa moshitopolwahoololo shaShikoto okudja momafiku 03 Juni fiyo 13 Juli ou fike po76 800.
Omwaalu womavalulo ovanhu wodula ya dja ko owa ti, oshitopolwahoololo oshi na ovanhu ve fike po127 612.
Kamusela wokoshikandjohoololo shaNiipa Vilho Nuunyango okwa ti okomisi yomahoololo fiyo opapa oya shangifa ovanhu ve fike po18 000 moshikandjohoololo shaNiipa eshi kwa wedwa ovanhu ve fike po13 000 ovo ve lishangifa oshivike sha dja ko. “Ovanhu otava tameke okweenda paife okuyelakanifa noivike ya dja ko. Ovakulunhu otave ya lela momwaalu uhapu ve lishangife va ka hoolole, ndee otashi udifa nawa neenghono.
“Oupyakadi wetu ovanyasha ashike, ovo inava hala okulishangifa va ka hoolole. Vahapu vomuvo kave udite ko efimano lokuhoolola, sho osho u wete vahapu inave lishangifa oukalata vomahoololo natango.
“Ewi loye ola fimana kexumokomesho loshilongo eshi, ndee otwa hala lela keshe umwe opo aye ndee te ke lishangifa okakalata komahoololo,” Osho a ti ngaho.
Omunambelwa womahoololo koshitopolwa shaShikoto Ester Hipangelwa okwa ti omalishangifo otaa ende nawa fiyo opapa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
