Etale lya ningi aaniilonga yalyo yopakathimbo nayi

EHANGANO lyoohi lyEtale Fishing olya pe aaniilonga yalyo yopakathimbo okondalaka yiilonga yuule woomwedhi ndatu nondjambi aniwa konyala yoodola omathele 660 komwedhi.

Aaniilonga konyala omathele gane oya ti iimaliwa mbika iishona oku yeleka naambyoka yo ya li ha ya futwa pethimbo ya li ha ya longo kohi ya labour hire.Aaniilonga ina ya nyanyukilwa okondalaka dhiilonga mbyoka ya pewa kehangano lyoohi konima yoveta yalundululwa yaaniilonga ya tulwa miilonga okuza mesiku lyotango lyomwedhi nguka. Oveta ompe ota yi thiminike omahangano giilonga opo ga pe aaniilonga mboka onkalo yiilonga yafa ndjoka yaaniilonga yawo taya kalele. Shoka sha pe aaniilonga mbaka omaipulo ooshika kutya Etale ngashingeyi aniwa ota li ya futu oodola 7, 83 mowili, ya ti shika osho eyugo lyolyene.Omahangano gakalelapo aaniilonga mbaka, ngaashi lyo Namibia Seamen and Allied Workers Union noshowo ndyoka lya Namibia Food and Allied Workers Union oga ti ondjambi ndjoka oyi li unene pevi, okuyeleka naashoka hashi futwa komahangano galwe.. Omahangano galwe moshikondo shoohi oha ga futu oodola 11 nenge oodola 12 mowili. Erkkie Shitana amushanga gwa Nasawu okwa ti ehangano lye ina li panda omuthika gwondjambi gwa tya ngaaka. Okwa ti shika otashi ti omuniilonga ta longo ootundi 40 moshiwike ota ka futwa ashike oodola dhili pevi lyomathele 660, oku yeleka naaniilonga yalwe.Euvathano lyiilonga naaniilonga ota li hulile muKotoba na opena ompito kutya mbaka ita ya ka pewa iilonga we konima yaKotoba. Shitana okwa ti kaye uvite nawa kombinga yoshinima shoka. Nafau okwa ti yo otaya kambadhala oku tsakanena newiliko lyEtale opo ya tale ngele ota li zimine oku gwedhela aaniilonga mbaka. Ewiliko lyEtale ota ku hokololwa lya li lya za mo moshilongo sho lya pulwa oku gandja okomenda yalyo moshinima shika.