ESIKU uuna Ompangu Onene yoshilongo tayi ka pulakena eindilo lyoongundu dhompilameno kombinga yokukondjitha etokolo lyOmpangu Yopombanda ota li ka gandjwa ashike uuna ndoka eindilo ndika lya gandjwa kOmpangu Onene.
Sigo oompaka ina pa tulwa natango esiku ndyoka Ompangu Onene tayi pulakene eindilo ndika.Amushanga gwOmpangu yopombanda, noshowo gwOmpangu onene, Elsie Schickerling osho a yamukula omapulo go The Namibian.Okwa koleke kutya opwa ningwa etseyitho kutya oongundu omugoyi ota dhi ka kondjitha etokolo lyOmpangu yOpombanda mOmpangu onene yoshilongo. Shika osho onkatu yotango mondjila yoku ninga eindilo opo oshipotha shika shivule okupulakenwa.Oshipotha otashi kondjitha etokolo lyaapanguli, Petrus Damaseb na Collins Parker ndyoka lya gandjelwe oshiwike shaziko.Schickerling okwa ti omanga inaapa gandjwa eindilo lyokukondjitha etokolo lyOmpangu Yopombanda, itapa vulu natango okuuthwa esiku kutya oshipotha shika otashi pulakenwa uunake.Esiku lyepulakeno lyoshipotha shika ota li gandjwa komupanguli omukuluntu gwa Namibia, Peter Shivute, uuna eindilo okukondjitha etokolo lyompangu yopombanda lya taambwa okuza koo naku ninga eindilo.Pamulandu gOmpangu Onene, naku ninga eindilo okuna oomwedhi ndatu okushininga okuza kesiku ndyoka etokolo ndyoka lya gandjwa.Kapena natango omatompelo ga gandjwa meindilo. Ndele opwa gandjwa etseyitho, kutya ndika otali kondjitha oshitopolwa shimwe shetokolo lyomupanguli peresidende, Damaseb, nomupanguli Collins Parker, moka ya tendemo eindilo lyoongundu dhompilameno moka dha li dha indile opo omahogololo ga Novemba 2009, ga ekelwehi nenge ga yalululwe.Eindilo kOmpangu onene ota li kondjitha woo etokolo lyaapanguli mbaka yaali kutya oongundu ndhika odho nadhi fute oshimaliwa shOkommissi yomahogololo noshowo shoka shoSwapo,Oshipotha shika osha li sha tendwa mo melandulathano lyompangu yopombanda, oshoka okwa monika kutya shika osha li sha gandjwa ethimbo lya toka. Pehala lyo ku kala sha shangithwa nale meni lyethimbo ndyoka lya uthwa. Oshipotha shika osha li sha shangithwa potundi 16h30 omanga ombelewa yamushanga gwOmpangu yopombanda ohayi hulile okutaamba omaindilo goludhi nduka potundi 15h00 esiku kehe.Omumvo 1995 ongundu yompilameno yopambelwa, DTA oya li ya kondjitha iizemo yomahogololo mOmpangu yopombanda ndele kaya li ya sindana.DTA okwa li a hala a pewe a konakone iikwamahogololo ayihe, opo ando a ye kompangu.DTA okwa ningi eindilo kompangu na okwa kanitha oshipotha shika mOmpangu yopombanda, shika osha li sha ekelwahi. DTA okwa li a ningi eindilo kOmpangu onene ndele ndika nalyo ina li pita oshoka okwa lombwelwa kutya omapiyagano ngoka ga monika mo itaga eta po elunduluko lyasha miizemo yomahogololo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
