Esiku lyOmalaria nuumvo lya dhimbulukilwa pOmona wa Tjihozu

ESIKU lyOmalaria ndyoka hali dhimbulukiwa muuyuni auhe meti 25 Apilili nuumvo moNamibia olya dhimbulukilwa pOmona wa Tjihozu mOndoolopa ya Shifo po Ruacana mOshitopolwa sha Musati mEtitano lyeti 24 Apilili 2009.

Esiku ndika olya li lya popithwa kOministeli yUuhaku nIilonga yOnkalonawa Omundohotola Richard Nchabi Kamwi noshowo kOmukuluntu gwEhangano lyUuhaku mUuyuni mu Namibia Omundohotola Magda Robalo ngoka oshipopiwa she sha etwa po kOmundohotola Desta Tiruneh noshowo ku Gavena yoshitopolwa sha Musati , Sackey Kayone ngoka oshipopiwa she sha leshwa pehala lye ku Kaansela gwOshikandjohogololo sha Shikuku tate Peter Endjambi.
Aapopi ayehe, unene tuu Minista Kamwi, oya kunkilile oshigwana shi longithe omayele nomalombwelo ngoka tashi pewa kAaniilonga yUuhaku moshilongo opo shi ikelele komukithi gwa Malaria.
Ooshiithanene shEsiku, shoka sha tamekwa nOmaashinga yi lilwe komeho kEtanga lyEgameno tali hiki omambendo kumwe nOpolisi tayi shaluta, taya ende momapandaanda gomondoolopa ya Shifo moka noshigwana sha lamba mooha.
Oshiithanene shika osha li sha kalwa kOokaansela ngashi ku Kaansela gwOshikandjohogololo sha Ruacana Lazarus Kornelius, Kaansela gwOshikandjohogololo sha Anamulenge tate Josef Kanyenye Aluvilu, Kaansela gwOshikandjohogololo sha Shikuku tate Peter Endjambi ngoka wo a li a kalele po Gavena yOshitopolwa sha Musati tate Sackey Kayone ngoka kaa li po omolwiinakugwanithwa yilwe palwe, Omukwaniilwa gwUukwaluudhi tatekulu Josia Shikongo Taapopi nOmalenga ge gamwe noshowo ngoka gUukolonkadhi, Omuunganeki gwoSwapo moshitopowla sha Musati Tiytus Kanyele, Aakalelipo yUuhaku ya za kIitopolwa yi ili noyi ili noshowo Omahangano gUuhaku gi ili nogi ili, Aapolisi nAakwiita nAawiliki yalwe yOpashigwana, aanangeshefa, aapangi, aalongisikola, aanafaalama yOotate Jacob Kaherero Omaalala nayakwawo oyendji, aanona yOsikola noshigwana oshindji osha li sha gongala pOmona wa Tjihozu mpoka nokupulakena ketumwalaka lyOministeli gwUuhaku.
Oshiithanene osha li sha wilikwa kOmundohotola A. Hatutale Omukuluntu gwUunamiti mOmusati nosha egululwa negalikano kOmusita e li moshipundi shevululuko tatekulu Fillemon Alugongo.
Opwa li wo oongundu dhomaudhano gOpamuthigululwakalo dhaakuluntu naanona ndhoka dha nyenyepeke oshiithanene shEsiku nawa lela. Opwa ningwa wo oshinyandwa oshiwanawa tashi popi kombinga yokukelala Omalaria mokati koshigwana nosha holola wo mpoka nkene aakwashigwana yamwe kaye hole momagumbo gawo mu pombelwe ku pombela nohaya kwatwa nee kOmalaria ndele taya dhipagwa kugo.
Tashi popi now nkene aakwashigwana yamwe ngele oya kwatwa kuuvu wOmalaria haya yi koonganga hoka kaya mona ko ekwatho lyasha shpo okufutithwa ashike oongombe dhawo yo tayaka sa komukithi ngoka gwa Malaria. Oshinyandwa shoka oshiwanawa kwali, tashi popi wo kombinga yaakwashigwana taya pewa oonete kUuhaku nokOmahangano gUuhaku, ye kiigamene kokulika koomwe opo yaa kwatwe kOmalaria, ihe ohaye ke dhi loongitha okukwata nadho oohi noontangu dhawo ya kalye.
Oshinyandwa shoka tashi popi wo kombinga yiikunwa, kutya ngele oho nu unene, ku kala we ho dhiginine omalombwelo nomayele to ga pewa kAanuuhaku momikunda nenge mIitopolwa yeni moka. Tashi vulika wo wu landithe po oonete dhoye momalovu, ano motombo nomepwaka nenge mombike nokukala po owala to lika koomwe nokukwatwa ngeyi komalalria.
Oshinyandwa shika tashi kunkilile oshigwana shi yuthe komalombwelo gOpauhaku nokukala itashi landitha po we oonete dhasho nenge shi kale tashi dhi kwatitha po oohi, ihe shi dhi longithe mokwiisikila nawa opo shaa like koomwe nokukwatwa ngeyi kOmlaria.
Oshinyandwa tashi eta wo puuyelele nkene pombela momagumbo nosho tuu a simana ngiini.
Omapandulo oga ningwa ku Kaansela tate Lazarus Kornelius nokwa tamekiwa nee netyapulo lyoshiithanene ano lyEsiku lyokudhimbulukwa Omalaria muuyuni.