Epukululo lya simana

MOSHIFO sheti 3 Juni 2010, pepandja eti 25, mEhokololo li li kohi yoshipalanyolo tashi ti .Oomeme ye na ombuto ya maashinga , omu na uuyelele tau ti Meme Vicky Noa naye okwa kuthwa oshivalelo she, okuza tuu sho i iholola kutya oku na ombuto momumvo 2001.

Shoka, nani, kashi li mondjila. Meme Vicky Noa ina kuthwa oshivalelo, ihe okwa patwa ashike oluvalo. Kutya okwiiholola momumvo 2001, nasho hasho, ye mwene ota ti okwiiholola momumvo 2003.
Nande ongawo, meme Vicky ota ti, sho a patwa oluvalo ngawo, ka li a lombwelwa kutya ota patwa oluvalo. Okwa ka uva ashike kaapangi, esiku limwe sho e li mOshipangelo mOvenduka taye mu lombwele kutya okwa patwa oluvalo molwashoka oku na ombuto yo HIV/AIDS. E shi lombwelwa konima sho okanona ke hoka kali ka yonuukila mela, ka tandwa mo pauvathano lyawo nomundohotola gwe. Shoka shokumona kutya oshivalelo she nani inashi tandwa mo, Vicky ota ti okwe ke shi mona mo sho natango tayi komasiku. Tashi kolekwa wo komundohotola gwe pakonaakono ndjoka a pulile a ningilwe, kutya inashi kuthwa mo shili, ngashi aapangi mbeyaka yokOvenduka ye mu lombwele. Meme Vicky ota indile kEpangelo, ano kUuministeli wUuhaku kutya oofooloma adhihe ndhoka hadhi udhithwa kaanuuvu ya taalela etando, kutya nee oyoludhi luni, dhi kale momalaka gaavalelwamo, opo ya kale haye dhi lesha yoyene noku dhi uva ko nawa manga, inaye dhi shaina, ya ka tandwe ihe nawa.
Mboka ye li moshitheta oshidhigu, pethimbo ena okushaina ofooloma ndjoka, naya kale ngaa ya yelithilwa nawa, manga inaya ya metando.
Kombinga yokushangwa kutya meme Vicky okwa kuthwa oshivalelo, noshowo kutya okwa ya puuyelele nombuto yo HIV/AIDS momumvo 2001, otwa hala okugandja ombili onene mwaashoka notwa pandula sho meme Vicky naayehe ya uvithwa nayi kepuko ndika, sho taye tu dhimine po.