Epititho lyompango ‘yUundaadhi ta li shekitha’

ONGUNDU yoDTA oya pangula nonyanya Egumbo Etiyali lyoparliamende sho lya pititha ontotwampango yOmakwatathano pwaana omalundululo ngoka ga li ga thanekwa.

Ongundu oya ti epititho lyompango ndjoka nonando opwa li omaipulo kombinga yiitopolwa yimwe yayo ota shi ulike kutya mboka ye na oonkondo ota ya vulu okuninga shoka ya hala no itaa ya pulakene ku yalwe.O DTA oya ti Egumbo Etiyali lyoparliamende olya mono sha pumbiwa okufala ompango ndjika komeho goshigwana opo shi gandje omaiyuvo gasho,molwaasho oyendji oya li ye na oshimpwiyu noshikalimo shompango ndji, pethimbo ya li ta yi kundathanwa mOshigongi shOpashigwana.Oya ti oya li yuuvite kutya sho egumbo etiyali lya tokola opo li pulakene oshigwana osha li shoshili, nelalakano okuninga omalundululo mompango ndjoka.Ongundu ndjika oya lundile aatotimpango yomegumbo ndika kutya oya lombwelwa kominista pamwe nokabinete ya dhimbwe okupulakena koshigwana, no ya pitithe ompango ndjoka pwaana omalundululo gasha.’Shika osha hala okutya kapena oonkundathana dhopaudemokoli ngaashi ongundu ta yi pangele ha yi popi,’ osho oDTA ya ti momushangwa.ODTA oya ti epangelo olya tindi okukwatela mo ontokolwa ndjoka ta yi indike okutsakaneka omakwatathano ngele kapena elombwelo lyompangu, molwaashoka olyo elalakano lyalyo okutsakaneka omakwatathano pwaana elombwelo lyompangu.Osha yela kutya aatotimpango 26 ya hogololwa koshigwana otaya lombwelwa kominista shoka ye na oku ninga, ota shi ningi egumbo ndika lyokweendulula oompango li kale ashike oshiyolitha showala.ODTA ta yi tsikile ko ta yi ti kapena omuntu ta ka, tala ko egumbo ndika li na eitulemo monakuyiwa uuna ta li pula oshigwana omaiyuvo gasho.’Omolwashike oshigwana shina oku gandja ethimbo lyasho noonkondo dhasho oku tya sha komeho gegumbo etiyali lyoparliamende ngele nani lyo oha li vulu ashike okulombwelwa kominista shoka li na okuninga?’Ongundu oya pula woo kutya osha pumbilwa shike pu kale Egumbo etiyali lyoparliamende, na omolwashike aafuti yiifendela ye na okufutila egumbo ndika kaa li na oonkondo dha sha, unene tuu sho ha li tonwa oonkondo kominista.’Ngele aakwashigwana ota ya ilongo mo sha mushika kombinga yOmpango yOmakwatathano osho shika kutya epangelo lyoSwapo oli na oonkondo odhindji na ka li nakonasha naashoka oshigwana ta shi ti, na oli itaala moondunge dhalyo lyene.’’Oshigwana osha tegelelwa shifute iifendela niikwawo oshigwana na shi mwene ashike ngaashi uunona uushona komeho gaakuluntu,’ ongundu yoDTA osho yu uvite ngaaka.Omushangwa ogwa ti shoka oshigwana tashi vulu okuninga osho oku opaleka onkalo ndjika puuketha womahogololo mu Novomba. Oya indile aantu ya ka hogolole ya kuthe ko ‘epangelo kuumbishi woondoka’.’Ngele ye shi ningi opo owala taya vulu okweekelahi uulungilingi noshowo okulya oompanda mbali nokugalula uudemokoli, netungo lyoshigwana.