Epangelo ta li indike aalandithi aakwiilongo

OMINISTA yIipindi nOofabulika, Hage Geingob okwa dhiladhila oku indika aakwiilongo oku kuthombinga moongeshefa ooshona nodhopokati miilonga yokututa aantu, noshowo miilonga yokwoopaleka omafufu, nomwaambyoka yokufeweka omuntu.

Ishewe Geingob okwa ti ota ka longitha omautho gompango yomapungulo kutya omunangeshefa kehe omukwiilongo a hala okweegulula ongeshefa yokulanditha okuna okumona manga minista omanga , inaa tameka iilonga.Geingob okwa popi ndhika momushangwa oshiwike shayi, konima sho aakwashigwana ya li ya nyenyeta kutya aanangeshefa aakwiilongo otaya dhipaga po oongeshefa dhawo.Aanangeshefa mboka ya nyenyeta oyo moshimpungu shoongeshefa ooshona, unene aalandithi aashona, mboka ya gumwa unene kaalandithi yaaChina,’ osho Geingob ati.Omushangwa gwaMinista ogwa landula eindilo lya ningilwe kehangano lyaangeshefa AaNamibia metine oshiwike shayi opo epangelo li indike aanangeshefa mboka haye ya moshilongo okulanditha ndele yo ita ya eta po oompito dhiilonga, pakukwathela, opo omahupilo goshilongo ga koke.Omukuluntu gwehangano lyaNCCI, omusamane Taara Shaanika okwa tile momushangwa kutya oompango dhongashingeyi ota dhi pe epangelo oonkondo oku utha kutya oongeshefa dhontumba otadhi vulu okuwilikwa nokulongwa kaaNamibia yoyene onkene ina shi pumbiwa aakwiilongo opo ando ya pitikwe ya kale noongeshefa ndhoka.Meyamukulo lye Geingob okwa uvaneke kutya otaka longitha ompango ndjoka opo a se oshimpwiyu kutya oongeshefa ndhoka tadhi vulu okulongwa kaaNamibia odha gamenwa , omanga aanangeshefa yopondje otaya ningi eindilo lyu uka kuMinista , ngele oya hala okulanditha ngaashi mbyoka ha yi landithwa kaaNamibia.Geingob okwa ti otaka indika woo aanangeshefa aakwiillongo yaa longe moongeshefa ngaashi dhoku tuta aantu nomakambamba, iilonga yoosalona, esiloshimpwiyu lyoshipa noshowo eopaleko lyomuntu.Oonkatu ndhika ota dhi yi miilonga konima yoonkundathana noKabinete nokonima ngele dha nyanyangidhwa moshifo shepangelo. Okwa ti okwa kala noku kambadhala opo a mone epotokonono lyomukundu gwoshinima shika omolwaashoka oshi li oshidhigu. Geingob okwa tsakanene naanangeshefa noshowo noshigwana pOngwediva nOhangwena, netsakaneno ekwawo olya li moVenduka.Okwa tsakanene nepangelo ly aChina okupulakena kutya mbaka ota ya ngiini komanyenyeto ngaka.Unene tuu komanyenyeto kutya opena aanangeshefa Aachina taya longo shaa li pampangomokulanditha iilandithomwa yawo.Okwa ti aakwanepangelo lya China oye mu tsu omayele kutya aakwashigwana yaChina mboka ta ya pogola oye na oku landulwa pampango ya Namibia.Ekalepo lyaanangeshefa aaChina momangeshefelo gomoshilongo oshinima sha kala nokunyenyetwa olundji moshilongo.