Epangelo otali nyengwa okukongaondunge iwa yokulwifa oshikukuta

… Namibia okwa ingida eulumomumbwe loshikukuta

Ovanandjungu ova ti ondunge yepangelo yokulwifa oshikukuta kai na eenghono, noonghee nee otave isheke neenghono.

Eshi oshe ya konima pelesidente Nangolo Mbumba Omandaaxa a ingida eulumomumbwe loshikukuta ngaashi sha shangwa momafaneko epangelo.

Natango eengudu dopolotika otadi pula epangelo opo li kufe eenghatu da nuka po dokulwifa oshikukuta nondjala. Oshilongo osha wainima oilongo ngaashi Malawi, Zimbamwe naZambia, oyo nayo ya ifana kuningwe onghatu yopaulomomumbwe loshikukuta nondjala.

Omundjadjukununi woikwapolotika Rui Tyitende okwa ti kutya eshi kashi shi nande oshikando shotete taku ingidwa eulumomumbwe kombinga yoshikukuta ndee natango itashi kala nande oshikando shaxuuninwa.

“Eedula omilongo da dja ko, edopo lepangelo mokukonga ondunge ola ulika kutya ola dopa nale. Namibia okushiivike nawa kutya oshilongo hashi mono odula ishona nonghalo yomhepo hai lunduluka neenghono ndee opwa pumbwa pa tulwe omilandu dokuungaunga nonghalo yoshikukuta,” Osho a ti ngaho.

Tyitende okwa ti eenghalamwenyo otadi hepa nai nomumbwe yoikulya otai ningi oupyakadi wa keshe efiku paife kuvahapu.

Omundjadjukununi woikwapolitika Henning Melber okwa ti eulomumumbwe lepangelo kombinga yoshikukta otashi ulike kutya Namibia oku li oshilongo shimwe osho shi na eedjo domeva dishona nokwateelelika a mone oixuna kokulunduluka kwomhepo nota kala ta mono odula inai wana.

“Okwiingida eulumomumbwe kombinga yonghalo yoshikukuta oyo tai nyemateke neenghono okwa kala kwa teelelwa nale ndee inashi uya ongoshinima sha kala inashi teelelwa. Epangelo li na ko nasha ola pumbwa okulilongekidila omaupyakadi eli ngaho,” Osho a ti ngaho.

ODULA YOMAHOOLOLO
Melber okwa ti modula yomahoololo, osha fimana opo kutalwe nawa omilandu deengudu domilameno kombinga yoshikukuta noinima ikwao ya faafana.

Okwa ti omilandu nadi kala tadi kandula po omaupyakadi ngaashi aa.

Okwa ti omilandu nadi kala tadi kwashilipaleke okuyandja omeva awana komikunda nomeedoolopa noshoyo ounamapya nau kale wa kwatelwa mo momilandu omu.

Odula yaxuuninwa omo Namibia kwa li a ingida eulumomumbwe kombinga yoshikukuta okwa li omudo 2019.

“Ohandi koleke kutya, okudja momafiku 22 Mei 20204, epangelo ola ingida eulumomumbwe loshikukuta osho shi li moitopolwa aishe yaNamibia,” Mbumba osho a ti ngaho Omaandaxa.

OVANAMBIA OTAVA FI ONDJALA
Namibia kwa taalela omumbwe yoikulya neenghono.

I-Ben Nashandi, omukulunhuwiliki mombelewa yomuprima minista, eingido eli otali ulike oupyakadi woshikukuta. Noshikukuta eshi osha nyika oshiponga koshiwana ashishe.

EENDAMA OTADI PWININE
Ouministili wounamapya nounaimuna, omeva nomatendululo omadu owa ti eendama doshilongo otadi pwinine.

Oshilyo shongudu yoPopular Democratic Movement Maximilliant Katjimune osha ti efimbo ola fika ngaa nee opo oshikukuta shi talike ko nelitulemo kepangelo molwodula oyo inai wana.

“Oshilongo inashi mona odula ya wana eedula dihapu paife novanaafaalama ova fiwa ve li monghalo idjuu koshinima shi li ngaho,” Osho a ti ngaho.

katjimune , nande ongaho okwa ti okwiingida eulumomumbwe oko akuke kaku na eshi taku ti.

“Okwiingida eulomomumbwe kwa pelesidente inaku kala ashike pombapila. Naku tulwe moilonga ndee ovo va kumwa neenghono konghalo ei tava pewa omavatelo, unene ngaa ovanafaalama naavo veli koitopolwa yokomikunda,” Osho a ti ngaho.

Duminga Ndala wongudu yoLandless People’s Movement okwa ti oshinima eshi sha ingidwa kupelesidente shopaulumomumbwe osha pumbiwa nai moNamibia, molwoupyakadi oo tau denge unene oitopolwa yokomikunda. “Eshi otashi vatele epangelo opo li dule okulongifa oshimaliwa sha wedwa po nokumona omavatelo koiwana yopaunyuni, notashi eta onghalo yuungaungwe nayo meendelelo,” Osho a ti ngaho.

Ndala okwa ti oshinima shimwe sha pumbiwa okutota po oshikefa shoshimaliwa shoshikukuta nomutengenekwafaneko woshiwana osho tashi kala tashi vatele ovanhu ovo va dengwa nai koshikukuta nokomumbwe yomeva.