Epangelo ota li ka longitha oodola obiliona 1,58 molwa omeya, nuundjugo

EPANGELO olya dhiladhila okulongitha oshimaliwa shoodola obiliona 1,58 dha Namibia muule woomvula ntano ta dhi landula opo li andjaganeke omeya gokunwa noshowo uundjugo, unene komikunda.

Iimaliwa oyindji yomwaambika ota yi ka za komakwatho gokiilongo mbyoka ha yi gandja omagano.Omukuluntu wiliki gwoshikondo shokugandja omeya komikunda,Viktor Slinger okwa ti shika otashi ti epangelo ota li ka longitha oodola oomiliona 316 omumvo kehe.Slinger okwa popi ndhika pethimbo lyoshigongi iilonga sha li moVenduka shoka sha li ta shi kundathana kombinga yegandjo lyomeya nuundjugo komikunda.Nonando omwaalu omunene noshilongo osha ya komeho moku andjaganeka omeya noshowo uundjugo komikunda, okwa tilika kutya Namibia ita ka adha omalalakano goomvula evoyi ge gandjo lyomeya nuundjugo.Omalalakano gehumokomeho goomvula eyovi, oga hala aantu yokomikunda andola ayehe ya kale ye na omeya omayelele noshowo uundjugo wo kwii kwathela oku ya komumvo 2015.Iilyo longo ayihe yiiGwana ya Hangana oyi ipa omalalakano ngoka yi na okwaadha, ngaashi okushonopeka uuthigona, ondjala neso lyaanona noshowo oku hwepopeka iipumbiwa yopetameko monkalamwenyo yomuntu kehe.Pahapu dhomupevi Minista gUunamapya, omusamane Isak Katali ngoka oye a egulula oshigongi shika , oopelesenda 98 dhaakalimo yomiilando noopelesenda 80 dhaakalimo yokomikunda oye na omeya omawanawa gokunwa. Konyala oopelesenda 82 dhaakalimo yomiilando odhi na uundjugo wolela omanga komikunda oopelesenda ashike 21,1 odho dhi na uundjugo.Yamwe yaakalipo poshigongi oya ti oshindji osha li tashi vulu okwa adhikwa ndele molwa eendo kashona miilonga yepangelo iilonga olwindji oya katekwa.Omukalelipo shilongo gwa Icelandic moNamibia omundohotola Vilhjalmur Wiium okwa ti oshilongo she otashi kwathele memboolo lyomeya moKunene pamwe nUuministeli Womapya, ndele aanambelewa kayena iiyenditho molwaashoka mbyoka ya li ye na oya teka, no ya li ye na okuhehela osheenditho uule wiiwike ihamano opo ya vule okutsikila niilonga ya wo.