Epangelo ota li ka kondjela oshipambuliko

OONKUNDATHANA kombinga yomutungilo gwa Meatco tadhi ningwa oshilongo ashihe itadhi ka lundulula sha, pahapu yominista yuuunamapya.

John Mutorwa okwa ti etokolo lyokabinete kombinga yiilonga nomutungilo gwa Meatco ota li kala muuwanawa wiilyo ayihe moshikondo shonyama moshilongo.Mutorwa okwa ningi euvaneko noshowo ekwashilipaleko ndika pethimbo a popi naanambelewa aakuluntu muuministeli we omaandaha oshiwike shika. Okwa ti ngele opena ekondjelo lyoshinima shika, oshaanawa oku tegelela opo okabinete ka gandje etokolo lyako moshinima shika, ndyoka ta li ka kala muuwana woshikondo ashihe shonyama.Pethimbo ndika Meatco ota ningi iigongi yokutseyithila aanangombe naanafaalama, oku ya tseyithila omutungilo gwa thanekwa ngoka ogo tagu ka landulwa nokutulwa miilonga nkene ehangano ta li kala nokulonga. Omupopiliko gwa Meatco, Ebben Kalondo okwa tile momushangwa kuyele nuumvo kutya osha simana opo aanafaalama ayehe ya tseye nokuuvako oshilanduli tashi zi momutungilo omupe gwehangano ndika. Ndele nando ongawo Minista, Mutorwa okwa popile poompito odhindji a ti okabinete oko ashike ta ka, ka tokola onakuyiwa ya Meatco. Pahapu dhe omutungilo gwomonakuyiwa gwa Meatco otagu ka tokolwa kokabinente, netokolo ndika ota li ka tseyithilwa oshigwana moshikako shotango shomumvo nguka. Ongundu yiilonga yathikama maakalelipo ya za mo Meatco, mehangano lyaanafaalama opo ta ya itungupo nenge, Namibia Emerging Commercial Farmers Union, Namibia National Farmers Union noshowo Namibia Agricultural Union, oya li ya tula kumwe omushangwa gwomathaneko nkene ya hala Meatco a kale. Omushangwa nguka ogwa pelwe ominista pehulilo lya Novomba 2011. Pathaneko ndyoka epangelo ka li namo ompito yoku kalamo noshipambuliko momutungilo ngoka. Oompito dhoku gandja omauyelele kombinga yoshinima shomutungilo omupe gwa Meatco odha tamekele moVenduka momwedhi nguka momasiku 16 , 18 nomomasiku 20 ga January poGobabis nomomasiku 19 ga January poMalinda. Oshigongi oshikwawo osha ningwa pOshaanda metiyali noshikwawo osha ningwa pOtjiwarongo metitatu. Iigongi iikwawo ota yi ka ningwa poKhorixas momasiku 25 ga January, pOmaruru omasiku 27 ga January. Iikwawo ota yi ka ningwa mu February pOpuwo, Oshakati Country Lodge, Rundu Regional Council Auditorium noposhinyanga shiigongi shaKatima Mulilo.