… omukulunhuwiliki umwe okwa futwa oshimaliwa sha pitilila shi fike poN$720 000 kodula
Epangelo ola mweneka eendjabi donguduwiliki yehangano ledina Namibian Agronomic Board (NAB) konima eshi omuvaluli omukulunhu a mona kutya omukulunhuwiliki umwe mehangano okwa li a futwa oshimaliwa sha pitilila shi fike lwopoN$700 000 kodula.
Olopota yomuningi womavalulo yomudo 2021/2022 yehangano loNAB, olo li li ehangano lepangelo li na sha nokuungaunga nokulanda oinima younamapya nounaimuna kondje yoshilongo, okwa li la holola omanyenyeto ahapu, mwa kwatelwa ondjabi yomukulunhuwiliki umwe.
Kandjeke okwa mona kutya omukulunhuwiliki woshikondo shi na sha noshimaliwa nomakwatafano opaungoba Barbara Snyders-Bock okwa li a futwa oshimaliwa shi fike pomiliyona imwe oshinghwanyu nhee kodula omanga kwa li ashike a pumbwa okufutwa oshimaliwa shi fke poN$722 000, ngaashi omilandu deendjabi depangelo tadi ti.
Natango okwa li a pula kutya omolwashike ondjabi yaSynyders-Bock kwa li ya koyelela onghatu ya xuuninwa yewilikongudu oyo i fike poN$927 000 kodula.
Omupopiliko woshikondo shoshimalwa nomangeshefo opashiwana Wilson Shikoto okwa lombwela oThe namibian oshivike sha dja ko kutya oministili oi na eshiivo kombinga yolopota oyo.
“Okukwashilipaleka ouyuki nelongelokumwe nomilamdu odo da tulwa po, oministili oya tokola opo i mweneke manga eendjabi dovakulunhuwiliki aveshe fiyo oshinima eshi sha ungaungwa na sho,” Osho a ti ngaho.
Ashike nande ongaho Shikoto ina yandja naana ouyelele wa wana kutya ovakulunhuwiliki vangapi va futwa eendjabi da pitilila.
Okwa ti etokolo lokumweneka eendjabi oli li ongonghendabala yoministili yokuwapaleka oshinima eshi nokukwashilipaleka eefuto di li pauyuki momahangano aeshe epangelo.
Shikoto okwa ti eendjabi edi tadi popiwa okwa li da kolekwa konguduwiliki ya dja ko konima yeedula omulongo.
“Endjaabi edi okwa li da ningwa koshi yomalelo a yooloka nokwa li sha ningwa omanga omilandu odo da tulwa po koministili inadi ningwa,” Osho a ti ngaho. Shikoto okwa ti oministili otai talula eendjabi paife opo i mone ngee otadi tu ngaa kumwe nomilandu deendjabi edi da tulwa po.
“Oinima imwe oyo tai ka ningwa opo kwaalulwe oshimaliwa eshi otai ka tokolwa konima yomatalululo nomilandu dopaveta odo tadi kwashilipaleke kutya keshe osho tashi ka ningwa po oshi li pauyuki noshi li paveta,” Osho a ti ngaho.
OSHO SHA MONIKA PO
Molopota, Kandjeke okwa yandja ombedi kewilikongudu eshi la dopa okuluufa komalombwelo oministili naashi inali yandja eudafano olo la dja kuminista komuvaluli.
“Omavalulo okwa mona kutya ondjabi yomukulunhuwiliki momahangano epangelo oya pumbwa ashike okukala i fike poN$722 000 komudo, omanga onguduwiliki yomudo 2020/2021 ya koleka ondjabi i kale i fike poN$927 476 ngee oihapu.
Ashike nee, ondjabi yomukulunhuwiliki moshimaliwa shokomudo shodula ei okwa li shi fike poN$1 407 122,” Kandjeke osho a ti ngaho.
‘INO NYANYANGIDA’
Omukulunhuwiliki woNAB Fedelis Mwazi okwaanya okutya ko sha kolopota ei yomavalulo shaashi vati inai kundafanwa natango mopaliamente.
Olopota ei okwa li ya hangika kependja lokomalungula lomuvalulindjai koThe Namibian.
Mwazi okwa ti oikumungu ina sha novanailonga vehangano eli kai shi yokukundafanwa noshiwana.
“Inatu manguluka okukundafana osho sha popiwa molopota omo pandodo ei. NAB okwa tala kutya oikumungu i na sha novanailonga vetu kaishi yokweetwa poluhaala nokaiwa nokuya momatwi oshiwana.”
Otwa tota po omikalo diwa dokuungaunga nomahandu nomanyenyeto oo taa dulu okuholoka pokati kovanailonga.
“Omilandu edi oda etwa po momukalo oo tau kwashilipaleke ouyuki nelongelokumwe neeveta nomilandu da pumbiwa,” Osho a ti ngaho.
Mwazi okwa lombwela oThe Namibian opo iha nyanyangide oshinima eshi.
“Ohatu pula opo muha nyanyangide ouyelele kombinga yoshinima eshi, shaashi ngee omwe shi ningi otashi teya oufemba wopaumwene wovanailonga vetu notashi dulu okweeta oilanduli yopaveta.
Shi na sha noshinima eshi oThe Namibian okwa li ya pula Sydners-Bock, oo a ti nai ye kuMwazi.
“Didilika kutya omukulunhuwiliki ashike wehangano ta dulu okupopya noikundaneki. Onghee nee, ohandi tu mu omapulo oye kuye,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
