Epangelo lya ulike ehangano epe lyokutala ongushu yokawe

OMUKONAKONI gwongushu yokawe ngoka a ulikwa kepangelo oku li momake gaakwashigwana aaNamibia. Omutali gwongushu yokawe gwepangelo ha fupipikwa nedhina [GDV] oku li momake gaaNamibia okuudha.

Ehangano lyokutala nokuyeleka ongushu yuuwe wa Namibia, epe oha li ithanwa Gazania Investment Eighty Eight, na oli li miikaha yaaNamibia ye li yane kehe gumwe ena mo oshipambuliko oshitine shimwe nenge tu lye ooperesenda 25 kehe gumwe.Ooyene yehangano ndika ota ku tiwa oyena uungomba womuule moku tala kutya okawe ke li komeho gawo okongushu yithike peni.Pethimbo epangelo na Gazania ta ya koleke euvathano lyoomvula ntano lyiilonga yokutala ongushu yokawe, omusamane Joseph Iita amushanga omukuluntu mUuministeli Woomina Niikwankondo okwa ti euvathano ndika olyo, pandjokonona.Omukonakoni gwongushu yokawe oomvula ntano dha piti okwa li ha ithanwa Diamond Marketing Consultants[DMC], okwa li oshitopolwa shehangano lya za pondje yaNamibia, nehangano ndika olya longo uule woomvula omulongo li li miikaha yaapunguli yokondje yoshilongo..Iita okwa ti sho ngashingeyi omutali gwongushu yokawe e li omuNamibia, nguka otaka koleka nokwiindjipaleka egameno, elongitho ta li tsikile, omahupilo goshilongo, iifendela na oshikwawo ota kaleke iimaliwa moshilongo okuyeleka nokuyifala pondje ngaashi sha kala ta shi ningwa sho omutali gwongushu a li ehangano lya za pondje.Oshinakugwanithwa shehangano ndika oku tala kutya ongushu yokawe momalanditho oyi li nawa omanga okawe inaaka tumwa ka ka landithwe pondje.Ehangano ndika oli na ishewe iilonga oku yoolola uuwe pamuthika gwawo, ta li tonatele elanditho lyuuwe auhe wa Namibia, ta li kala aluhe li na ontseyo kwaashihe ta shi inyenge muuyuni kombinga yelanditho lyokawe. Ta li pulakene kutya omainyengo agehe momalanditho gokawe paigwana otaga gumu ngiini aalongi yokawe noshowo aalandithi yokawe.Ehangano oli na woo oshinakugwanithwa ngele lya pulakene nokulandula ayihe mbika li gandje omayele kepangelo kombinga yokuyoolola okawe, okukapa ongushu, noku ka landitha.Omunashipundi gwa Gazania okwa ti yo oya vulu oku mona iilonga mbika oshoka oye na ontseyo nuunongo kombinga yiilonga yokawe moshilongo, noshowo kutya yo oye na ontseyo nuungomba mboka ya mono sho ya longele omugandji gwongushu gwonale noshowo sho ya longele De Beers.Iilyo ya Gazania yilwe oyo Manfred Isaacks, Timotheus Mujeu na Albino Prungu.Ota ya ka longa nooyakwawo ya ne, noshowo aailongi ye li yane.