Epangelo lya hala okutunga odama poNeckartal

EPANGELO ota li dhiladhila okutunga po odama momulonga gwa Fish konyala ookilometa omi 40 muuninginino wa Kaiti, ngele osha ningwa epangelo ota li kala lya yumuna po ondungedhiladhilo yaaNdowishi ya faathana yokonima yoomvula ethele dha piti.

Odama ndjika oya tegelelwa yi ka kale oyo onene, tayi kala onene lutatu kwaandjoka yaHardap yo popepi noMalinda. Okwa thanekwa yi tungwe kuumbangalantu woshitaasi sheshina lyokolutenda poSeeheim pooha nofaalama yedhina Neckartal. Odama ya Neckartal oyi li momulonga gwa Fish konyala ookilometa 25 kuumbangalantu wa Seeheim, ota yi ka gandja omeya gokutekela omapya goohectara 5 000 ngoka ge li muumbangalantu noshowo muumbugantu wondjila onene yopokati ka Kaiti na Seeheim.Odama ya thanekwa ya Neckartal oyi na oonzo dhomatondokelo dhuunene woombinekilometa 45 365 ngoka ta ga vulu okweeta mo omeya gondjele yookubikemeta oomiliona 397 komvula.Ekuma lyodama ndjika olya tegelelwa li kale lyomuthika gwoometa 66 oku uka mombanda omanga momutamo ta li kala oometa 480.Odama ota yi kala noku pungula omeya guu windji wookubikemeta oomiliona 846 uuna yu udha no ta yi siikile oshitopolwa shuunene woombinekilometa 39.Opwa thanekwa omunino ta gu ka tungwa konyala ookilometa 26 oku za pekuma lyodama opo gu fale omeya gokutekela komapya.Uuministeli wOmudhingoloko nOmapashiono owa gandja elombwelo opo pu ningwe ekonakono li nasha no nkene omudhingoloko ta gu ka gumwa ketungo lyodama ya tya ngaaka. Oonkundathana kombinga yaashika odha li ko metitatu poKaiti. Oshikondo shegandjo lyomeya komikunda mUuministeli wUunamapya osho shi na oshinakugwanithwa shi na sha noprojeka ndjika, omanga ehangano lyoengineer lye dhina Knight Piesold Consulting olyo ta li ningi omakonakono ge na sha nomudhingoloko. Kehe gumwe ewete a gumwa koshinima shika na ishangithe ko eemaila ndjika gleicher@knightpiesold.com, noshowo omagwedhelopo kehe nago na ga tumwe kondjukithi ndjoka.