Enkondopeko lyaakiintu oshipatululo kekoko lyomahupilo

EKOKO lyomahupilo guuyuni neshonopeko lyoluhepo muuyuni ota li vulika ngele aakiintu oya pewa oompito ya kuthe ombinga mokuninga omatokolo, oya nkondopekwa pamahupilo na oye na oompito oku indila oshimaliwa ya tameke nenge ya kokeke oongeshefa dhawo.

Mbika oyo iinima ya simana ya ndhindhilikwa momushangwa gwiigwana Hangano gwedhina World Survey on the Role of Women in Development.Omushangwa ota gu ti, aakiintu oha ya mono iiyemo yooperesenda 16,5 okuyeleka naalumentu muuyuni, nehogololo lyawo lyiilonga olya kankamekelwa kokwaathike pamwe kwiilonga mehala lyiilonga, naashoka aakiintu olundji oyo to adha ta ya longo iilonga mbyoka ihaa yi futilwa sha.Nonando ngashingeyi aakiintu oyendji ye li miilonga, natango omwaalu gwawo omunene ota gu adhika moshitopolwa shoka shaali pambelewa, moshitopolwa shika oshi na oondjambi ooshona sho ina shi gamenwa kompango yaaniilonga omathimbo ogendji.Ekonakono ndika olya ti okushonopeka okwaathike pamwe, unene mokuaadha oonzo dhopamahupilo nodho pashimaliwa otashi vulu oku hwepopeka ehumokomeho, noshowo okutidha po oluhepo.Oomeme oyendji sigo oompaka ka yena oshitopolwa oshinene momahupilo molwaashoka iha ya pewa iimaliwa koombaanga oshoka aniwa ka ye na iikulila, onkene olundji oya patelwa pondje yomahupilo gopambelewa.Omushangwa ota gu ti moSouth Africa oomeme oye li ooperesenda ntano mokupewa iimaliwa okuza koombaanga, sha hala okutya natango mbaka otaya ningilwa okatongotongo ngele ta shiya komayakulo gopashimaliwa.Omanga omushangwa ota gu ti mUganda ooperesenda ashike dhi li 9 dhiimaliwa yokuhehelwa odho dhili miikaha yaakiintu, na moBangladesh iimaliwa yi li momake goomeme operesenda 1,8 noongeshefa dhi li mewiliko lyoomeme odhili owala ooperesenda dhi li kohi ya mbali.Omushangwa ogwa thaneke kutya opo oomeme ya likole uuwanawa wopamahupilo, oye na oku pewa oompito dha eguluka okupewa omikuli, okuza miipungulwa, mekwashilipaleko, miimaliwa ya tumwa oku za kiilongo yilwe nosho tuu.Oompito dha eguluka koomeme oku mona oonzo dhokulongitha nadho odha pumbiwa opo oomeme ya vule okuhuma komeho nawa.Shono kaa yena ompito okwaadha oonzo dhopamahupilo, oomeme oyendji muuyuni ota ya nyengwa okwiikwashilipaleka nokwiigamena kwaambyoka inaayi tegelelwa ngaashi uukulupe, uunkundi, uulema, okwaana iilonga, noshowo omashongo galwe gonkalamwenyo.Oomeme opendji ka ye li natango pomahala omanene gokuninga omatokolo unene momalutu ngaashi gokutota oompango moka hamu uthwa nkene eliko lyoshigwana lina okulongithwa.Omushangwa ogwa ulike kutya ooperesenda ashike 27 dhaakiintu miilongo 70 mboka ya talika ye na oonkondo nenwethemo ngele tashiya komatokolo nokewiliko.Ogwa ti nonando oshiwetike kutya pomahala mpoka puna oomeme ta ya ningi omatokolo iilonga oha yi humu nawa komeho, uuyuni natango owa fa ashike kaau weteko.