Embo tali popi oohedhi dhaHaikom

EHANGANO lyokukwathela pampango (LAC) olya nyola po embo ta li popi kombinga yoohedhi dha Haikom yamwe yomaadhinwa aaSan mboka ya li yakala mEtosha uule woomvula odhindji sigo uuna ndoka ya li ya tidhwa po pehala mpoka kepangelo lyokatongotongo lya South Africa kuyele mo 1950.

Embo li na oshipalanyolo ta shi ti:’Born in Etosha-homage to the cultural heritage of the Haikom,’ olya shangwa ku, Ute Dieckmann ngoka ha wilike oprojeka yedhina Xoms Omis ongo shitopolwa sho LAC. Ndjika oha yi gongele uuyelele kombinga yaa Haikom, ondjokonona yawo noshowo oohedhi dhawo.Oprojeka oha yi longo pamwe nenongelo lyopombanda lya Cologne koNdowishi.Pethimbo embo ndika lya etwa puuyelele omathimbo ngaka komuwiliki gwo LAC Norman Tjombe okwa ti iikwamambo oyindji ta yi popi Etosha iha yi popi nando kutya pehala mpaka opwa li aantu yakala po.Iha pa popiwa kutya opwa li omwaalu omunene gwaantu, konyala oshigwana oshindji shoka sha tidhwa mpaka opo pu ye shoka tashi ithanwa Etosha nena.Omanga oshitopolwa shimwe shevi osha ningi oofaalama dhopaumwene, nangashingeyi odhi li oshipambu shaandhoka tadhi enditha ashihe nawa.Aahaikom oya kanitha evi lyawo ndyoka ya li haya longitha, Tjombe tati.Aanandjokonona oya dhimbwa thilu okupopya sha kombinga yaantu mbaka, inaya tumbulwa tuu ekalepo lyawo nando..Osha fa ashike ya li kaayepo.Kakele kwaamboka aashona taya longo mEtosha momwene noshowo mboka taya longo moofaalama nomuulando mboka uushona popepi nEtosha, oyendji yomaantu mbaka ka ye na nando onkalo ndjoka ta yi yape eithikameno..Embo ndika epe ota li hokolola ondjokonona yaHaikom, oohedhi dhawo, nekwatathano lyawo nEtosha.Omathimbo ngaka epangelo olya landa oofaalama mbali kuumbugantu wEtosha okutululula yamwe naashika oshinima oshiwanawa.Embo lyomapandja 78 lyomafano ogendji ota li eta omwenyo kEtosha molupe olwindji, ta li ulike omaukwatya ga yooloka gomahala gokunwina iikwakuti mEtosha, omahala guukongo, iikulundundu, omakango, nomahala gokuthuwila noshowo omiti dhi ili nodhi ili nkene dha lukwa melaka lyoshiHaikom.Omadhina ngaka ota ga holola nkene pena ekwatathano nuushitwe.Omushangi gwembo ndika Ute Dieckmann okwa ti osha pumbiwa okwaandjaganeka uunongo waantu mboka ya dhinika moNamibia.Ota li popi woo nkene aantu mbaka yeli mekondjo okwiihumitha komeho noompito ndhoka yena okushininga..Yaali yomo projeka ya Xoms Omis oyo Hans Haneb a avalwa 1929 okwa mana oondjenda muNovomba 2006 na Jacob!Uibeb a valwa mo 1938 okwa mana oondjenda mu June 2007. Oya li oshitopolwa shongundu ndjoka ya pulwa omapulo kombinga yEtosha oshoka yo, oyo yamwe yaamboka ya li aakalimo yomehala ndika omanga kwa li inaa ya tidhwa mo 1954.Embo ndika ota li adhika moositola dhomambo moshilongo ashihe.