Emanguluko lyiikundaneki oshinima sheso nomwenyo

OSHINIMA shomupeviperesidende gwoSwapo a uvaneke elongelokumwe niikundaneki konima yokuhogololwa opo a ka landule omuperesidende Pohamba uuna oshikako she shuuperesidende sha puko otashi kumike aakundaneki.

Hage Geingob okwa nyolwa miifo yimwe a ti ota ka egulula epandja epe mokweetapo omakwatathano omawanawa pokati kepangelo niikundaneki. Okwa endululwa aniwa ati ‘Ondiinekela kutya otatu tula ayihe yapitipo konima yetu noku tameka epandja epe’. Tse otwa hala okumona kutya ota ka ninga shike mwaashika. Poompito odhindji pethimbo ali ta ningi iikonga yokuhogololwa ongo omupeviperesidende gwoSwapo, Geingob okwa li a tindi okupopya noshifo shika. Ye opamwe naakondjeli yakwawo yatatu molwoshipundi shoka oya li inaaye tu yamukula sho tweya pula opo tu ye nayo moonkundathana, kombinga yomathaneko ngoka yenine oshilongo uuna andola ya hogololwa oku ninga aawiliki yasho. Geingob oye a li omuprima minista momumvo 2000 a li mewiliko lyoKabinete sho epangelo lya Sam Nujoma lya ti itali gandja we iinima yalyo yi tseyithwe musho , lyo andola tali futu. Elalakano lyalyo olya li oku lemaneka andola oshifo shika. Tse inatu tegelela oku kala tu holike, oshoka oshinakugwanithwa shetu osho okutseyithila oshigwana nokweetapo ompito yopashigwana yokukundathana eyokomeho moshigwana noshowo okuholola puuyelele omapuko ngoka taga ningwa kwaamboka yiinekelelwa ewiliko lyoshigwana.Olundji iikundaneki oya ningwa oshinima shoku pewa ombedhi nokuulwa nayi nelalakano oku yi mbandameka, yi kale itaayi kundaneke ngaashi osho shina okukala. Oyendji yomepangelo noshowo aanankondo mopolitika oya hala andola iikundaneki yi kale yaana omakankameno andola hayi tengele ashike shaahoka ombepo tayi yuukitha nenge hayi tsu oongolo ku shaangoka a kolola. O The Namibian oya zi kokule ando opo yi kale yaana ekankameno miilonga yayo, yo ando yi landule ashike shoka tashi ningwa pethimbo ndika. Oshifo shika ohashi kutha ekankameno moshinima shewiliko ewanawa nonando ihashi gama ombinga nenge shi yambidhidhe ombinga yahandimwe nenge yongundu yontumba. Uuna aatoolinkundana yetu ya yakelwako, kombinga yoshinima shontumba, mbaka oha ya landula shoka pankatu yopaithano notaya wilikwa komuthika gwopaithano nogwoohedhilongo lyeithano lyuutoolinkundana, mokulonga ngaaka tse otwiitula ashike mwaashoka shili muuwanawa woshigwana. Oshafa yamwe ya tegelela aatoolinkundana yetu ya kale nohenda nenge ya longe nomuthindo shiikwatelela konkalo nenge okulonga nokutala mpoka oshinima shontumba tashi endekele, nonando eendekelo ndyoka olili ashike meitaalo lyawo nenge momutalelo gwawo kombinga yoshinima shontumba. Oshiholelwa ooshika kutya yamwe oya li ya tegelela kutya pethimbo lyiikonga yomahogololo guupeviperesidende wo Swapo natu nyole omahokololo gomwaalu gwa faathana ga gama noshowo taga kondjitha , ookandidate ndhoka ndatu dha li methigathano, kokutya Geingob, Jerry Ekandjo na Pendukeni Iivula Ithana. Yamwe nookuli oya li ya thaneke kutya andola natu kale inaatu shanga omahokololo ngoka ga talikako taga ehameke ondhilo yaathigathani mbaka sigo okonima sho okongressa yo Swapo ya hulu, nenge aniwa tu shange omahokololo ngoka omanga okongressa inaa yi ya opo oonakushangwa ya monike mondjelo ombwinayi komeho gayakwawo.Shoka sha simana miilonga yetu osho uuwanawa woshigwana mokulonga kwetu kashina nee mbudhi kutya otatu konakona shike nopethimbo lini.Pethimbo omuperesidende Hifikepunye Pohamba a lundulula oominista dhimwe miilonga mokabinete ke oshiwike shayi okwa li a ti okwa ithana aatoolinkundana kEgumbo lyepangelo opo okupitila muyo a tseyithile oshigwana kutya okwa tokolapo shike. Onkene efalemo ndika otali ulike kutya aawiliki yetu oya pandula iilonga mbyoka hayi longwa kiikundaneki moshigwana.Onkene aawiliki oye na okutseya kutya tse katu lilepo ashike oku longithwa kesilohenda lyawo. Aakwashigwana woo nayo oyena uuthemba okupitila miikundaneki, okupula kutya olye ena oshinakugwanithwa shontumba naashoka okwe shilongitha ngiini nomuuwanawa walye, ongo oshiholelwa noshowo aakwashigwana oya hala oku mona woo kutya iinakugwanithwa ayihe oya longwa puuyelele nopwaana ngoka ta konenenwa nenge pwaana omanongono kutya ngandi ya ngandi otaku fofotwa aniwa a ninga shontumba shongandi.Naidoo momushangwa gwe okwa ti uuthemba wokupopya shoka omuntu uuvite osha simana meyokomeho. Okwa tsikile a ti osha simana woo oshoka shika otashi kumike oonkundathana kombinga yoompumbwe ngaashi iikulya, uulingilingi, ewiliko lyaali nawa, naashika ohashi fala sigo omomalunduluko ngoka tageyapo, molwaashike pena emanguluko mokupopya kombinga yiinima mbyoka inaa yi nyanyudha aantu.Okwa tsikile ati pethimbo lyelelo lyokatongotongo, iikundaneki yomuuyuni oyo ya kwathele nokuhupitha mboka ya li taya kondjitha okatongotongo, opamwe nokangundu okashona kiikundaneki moSouth Africa hoka kiithikamena kali ka kundaneke pwaana uumbanda. Oshikwawo iikundaneki yamanguluka noshigwana shiitulamo kashishi oshinima shongundu yopokati, ndele shika oshinasha nuuthemba waantu noshowo ekondjo lyoohepele oku pewa uuthemba wawo wopakotampango woku pewa elongo lyongushu , uundjolowele, nayilwe. Geingob nayakwawo oyeshi uushili waashika moNamibia. Naidoo okwa endulula nomuthindo epopyo lya Nelson Mandela a tile esiku o ANC tayi ka longa ngaashi epangelo lyokatongo lya longele olyo esiku ndyoka oshigwana shina okulonga no ANC ngaashi sha longele nepangelo lyokatongo. Onkene epangelo inali pumbwa okutala iikundaneki ongo aatondi ndele ongo oshitopolwa shimwe shoku kalekapo ethikopamwe melalakano lyokweetapo uuyamba kaaNamibia unene tuu mboka ya hepa noyeli moluhepo.Onkene otwa tegelela omuprima minista omupe a taambeko oshinakugwanithwa shetu shoku mu talela opamwe nayakwawo nkene taya gwanithapo shoka yo yiinekelelwa koshigwana.