Elunduluko mewiliko olya pumbiwa menkondopeko lyaaluudhe pangeshefa

OMUPERESIDENDE gwehangano lyoongeshefa lya South Africa(SABEF) Lebo Gunguluza okwa ti elunduluko lyaaleli moNamibia oyo ondjila yi na okulandulwa okutula miilonga omulandu gwokunkondopeka aaluudhe pamahupilo.

Namibia ina manitha natango omulandu gwe nguka. Sho a popi piitendele yewilikongundu lyomapashiono nomatalelopo moNamibia(NTB), Gunguluza okwa ti aaleli yoongeshefa oye na oku ninga oongeshefa dhawo omahangano gokwiilonga, ngoka gapumbwa okulunduluka,okuyeleka nokukala ashike taga longo shampa ashike tagiikalekepo Shika osho sha kala ta shi ningwa komahangano gomoSouth Africa petameko lyetulo miilonga lyomulandu gwenkondopeko lyaaluudhe momahupilo.Omulandu nguka gwatseyika BEE oguna okutalika ongo omulandu gwokugwanitha po oshipumbiwa go na gu kale woo gwa talikwa ko ongo ondungethaneko yopangeshefa yethimbo lyongashingeyi.Omahangano oge na okusoshimpwiyu kutya omatanga gago gokulanditha, goku yakula aayakulwa noshowo omakwawo oge na aantu yaza miitopolwa ayihe yoshilongo ashihe sha Namibia.Pa Gunguluza pokati ko 2000 no 2005 konyala oodola oobiliona 250 oya li ya gandjwa miikaha yaaluudhe tashi pitile momulandu gwenkondopeko moSouth Africa ndele shika osha li ashike sha pe omwaalu omushona uuwanawa.Omulandu gwa South Africa gwenkondopeko ogu na oonkuvu heyali, dho, odho uumwene, ewiliko, uuthike pamwe megandjo lyiilonga, ehumithokomeho lyontseyo, okugandja iilonga yokweeta po iinima komahangano gaaluudhe, ehumithokomeho lyoongeshefa noshowo ehumithokomeho lyonkalonawa pamahupilo.Gunguluza okwa tsomuthindo kutya enkondopeko olya kala lya tala ashike pehala limwe, na olya humitha komeho ashike shimwe shomwaambika iheyali unene uumwene noshowo ehumithokomeho lyonsteyo.Oongeshefa odhindji odha kala nomulandu gwokutala nokutegelela shoka ta shi ningwa po okushitalela momahangano ngoka omanene sho ogo ga tameke nenkondopeko lyaandjagana lyaaluudhe momahupilo ndyoka omahangano ngaka ga tala kutya ota li ga etele uuwanawa.Omashongo ngoka kwa li kwa talika geli mondjila yenkondopeko ogo ngoka kutya mboka ya mono uuwanawa tango sha pitile momulandu nguka oyo mboka ashike ya li ye na omakwatathano omawana papolitika, yalongwa. Shika osha kaleke konima enkondopeko lyomangungo gaaluudhe mboka oyo ya pumbwa okukuthwa konima yesiga moSouth Africa. Okwa ti epangelo olya kala ishewe ta li dhenge omuthindo kiipumbiwa ngaashi omulandu gwokulonga nawa, nomauvathano giitopolwa nenge giikondo pehala lyokutala kutya ondjila yini taga pitile opo ga sindane moshinkoti shenkondopeko, mokweetapo oshikondo shaagandjimayele, oku mbilipaleka uutile waatiligane kombinga nkene enkondopeko ta li gumu oongeshefa dhawo.Omulandu ogwa li woo gu na okutala kutya ooperesenda dhithike peni dhaantu mboka ya longwa ya pumbiwa nomoontseyo dhinipo. Na aaluudhe ya longwa yethike peni ta ya vulu okumona oompito dhenkondopeko.’Omahangano omanene oge na okusoshimpwiyu kutya iilonga mbyoka yasimana oyi na aaniilonga ye li nawa.SABEF okwa gandja omayele kutya uuna tapa ningwa etaambathano lyewiliko kehe oshilonga shasimana oshi na okukala shi na omuluudhe eli mewiliko nenge ti ilongo kutya ohashi wilikwa ngiini,’ Gunguluza ta ti Okwa ti ngele Namibia okwa kala ta tsomuthindo kombinga yompango yo BEE, noshowo omulandu negwanithopo lyaashika ngaasi hashi ningwa koSouth Africa nena shika ita shi eta ehumokomeho molwaashoka ota shi ka sinyalitha mboka taya kambadhala okulundulula omahupilo moNamibia.Otashi ke eta okwaa na engungumano momahupilo noshowo ekoko lyomwaka pokati kaayamba noohepele, naashika ota shi yi moshipala elalakano lyoku kokeka omahupilo goshilongo.