Elongitho lyiingangamithi olya londa: Kamwi ta ti

ELONGITHO lyiingangamithi oli li pombanda noonkondo mu Namibia pethimbo ndika, Ominista yUundjololowe nOnkalathano, Richard Kamwi osho a popi.

Kamwi okwa ti Namibia ita vulu okweetha a ningwe oshilongo shokulongitha iingangamithi na okwa ningi eindilo kAanamibia ayehe ya lopote kehe omuntu ngoka ta ka monika ta landitha iingangamithi nenge te yi longitha.Kamwi shika okwa li e shi popi mOvendka mOmaandaha.Okwa ti ti omathimbo ga zi ko, iikundaneki oya kala nokulopota omakwateopo ogendji gaakwiilongo ya adhike noopela dhuusila wOkokeina, ye ya mu Namibia okuzilila ku Brazil.Okokeina yi na ongushi yoshimaliwa sha thika pOondola oomiliona ndatu, oya li ya kwatwa ko kOshikondo shOpolisi hashi ungaunga nIingangamithi omathimbo ga zi ko.Minista okwa li a pandula Opolisi sho ya kwata po aantu mbaka, ta ti kutya elongitho lyiingangamithi olya ninga olindji noonkondo mu Namibia. ‘Namibia ke na nande okulongithwa ong’ondjila nenge ehala lyokuumbila iilonga yawo kayi li paveta,’Kamwi ta popi ngaaka. Kamwi okwa ningi eindilo, unene tuu kaakiintu, mboka ta ti kutya ohaya monithwa iihuna momagumbo omolu elongitho lyiingangamithi nomalovu, – ya lopote mboka taya landitha nokulongitha iingangamithi.’Omayalulo otaga ulike kutya aakiintu oyendji oye li taya longithwa mepititho lyiingangamithi. Oshiholelwa, otwa mona omusamane gwomwAangola ngoka a kanitha omukulukadhi gwe Omunamibia sho a pona okokeina,’ Kamwi ta popi ngaaka.Okwa ti oshi li tashi uvitha nayi okumona kutya Namibia oku li po a ninga ondjila yokweendithilwa iingangamithi, okufalwa hoka tayi ka longithwa. Omukalelipo gwIigwangangano gwOpakathimbo mu Namibia, Joyce MendsCole, okwa tsu kumwe na Kamwi, ta ti, oshinima shelongitho lyiingangamithi mu Namibia, osha kala mokupiyaganeka shoka sha longwa po kEpangelo kombinga yehumokomeho okuza pemanguluko.Okwa ti ngele moshilongo omu na elongitho lyiingangamithi, kapu na omuntu nenge ofamili yi li megameno. ‘Iingangamithi ohayi vulu okukondolola olutu nomadhiladhilo goonakuyilongitha,’ MendsCole ta popi ngaaka.Nonande Esiku lyOpaigwana lyEkondjithoelongitho nelanditho lyIingangamithi oli na ko siku limwe li dhimbulukiwe, Namibia okwa ninga nale euvaneko kutya ota ki imanga kumwe nIigwanahangano mekondjitho lyelongitho nalanditho lyiingangamithi.Pambelewa, Esiku ndika otali dhimbulukiwa mEtitano lyoshiwike shika, ihe Uuministeli wUundjolowele owa li wa tokola oku li dhana kuyele omolu iinakugwanithwa oyindji mboka yi li po.Otaku ka ningwa omahololomadhiladhilo gaali, limwe omEtitano omanga limwe tali ningwa mOlyomakaya mOvenduka, okudhimbululwa Esiku ndika. Ehololomadhiladhilo lyomEtitano otali ka tameka pohetatu yongula, tali ka za po Tommy Jarman Funeral Services mu Khomasdal, mepandaanda lya Hans-Dietrich Genscher na otali ka hulila nee pOsekundosikola ya David Bezuidenhout, mpoka iilyo yehangano lya Teenages Against Drugs Abuse (TADA), taya ka kuthila ko aahololomadhiladdhilo kiinyandwa yawo.