Elelo lyaNdangwa lya shaina euvathano lyetungo lyomagumbo ku Namib Bou

ELELO lyOndangwa mEtitano lya zi ko, olya shaina euvathano naNamib Bou (Pty) ltd, moka Namib Bou a tokola okutunga manga omagumbo eyovi limwe meendelelo ngashi tashi vulika.

Omukuluntuwiliki gwa Namib Bou, omusamane Johan Nienaber ta ti Namib Bou, ngoka e li oshilyo tashi kwathelwa kOfeema yoongeshefa dha Capricorn Investment Holdings Limited moka mu na Ombaanga ya Venduka nEhangano Ekwashilipaleki lya Welwitschia, oya shaina euvathano nElelo lya Ndangwa li na sha nokutunga omagumbo eyovi limwe mOndoolopa ya Ndangwa mehala limwe lyonomola No 882 nelalakano lyokutunga omagumbo omawanawa mOndangwa ngoka kage na ondilo unene notaga ka vulika nokwaamboka ye na iiyemo iishona.Omusamane Nienaber ta pandula Elelo lyOndangwa, Epangelo noshowo mboka taya ka longela kumwe nayo mokutunga omagumbo ngoka mOndangwa, omolu eyambidhidho lyawo. Nienaber ta ti Oprojeka yokutunga omagumbo mOndangwa ndjika otayi ka enda paikako muule woomvula twa thinda , shi ikwatelela kompumbwe yomagumbo ndjoka yi li po notayi ka kala po onene.Omukuluntuwiliki gwa Namib Bou, ta ti, mboka taya ka longela kumwe nayo ongashi Urban Dynamics Africa, Lithon Project Consultants mboka ye li aawiliki yOprojeka ndjika yokutunga omagumbo mOndangwa noshowo okulonga po iilonga yUuwindjinia.Meya gwondoolopa ya Ndangwa tate Naftal Andimba pethimbo lyeshaino lyEuvathano na Namib Bou okwa ti kutya etungo lyomagumbo eyovi mehala lyonomola ndjoka ontimulongo naandjoka 882 ku Namib Bou, oshinima sha simana noonkondo kElelo lyOndangwa nokaakalimo yomOndangwa nenge mboka ya hala yee ya kale mOndangwa molwashoka opwa kala lela ompumbwe onene yomagumbo mOndangwa na opo yi li natango, ya pumbwa okukandulwa po. Meya Andimba ta ti kutya Oprojeka yetungo lyomagumbo ngoka otayi ka gaandja wo iilonga kaakalimo yomOndangwa nomomudhingoloko shoka tashi ka pa aakalimo mboka iiyemo. Oprojeka ndjika, Andimba ta ti, otayi ka shendja wo ondoolopa ya Ndangwa oshoka pomahala mpoka pwa kala pwaa na omagumbo ngashiingeyi otapu ka kala omagumbo omawanawa lela nogopashinanena.Meya gwa Ndangwa ta pandula noonkondo Namib Bou nayakwawo ta longo nawa oshilonga shika sho taya longele kumwe nawa ngeyi nelelo lya Ndangwa mokuyambula po ondoolopa ya Ndangwa naakalimo ya mo.Kakele kOokaansela yOndoolopa ya Ndangwa, ngashi Meya gwOpevi gwa Ndangwa mee Letty Tuutaleni, mboka ya li peshaino mpoka, opwa li wo nee Chris Matthee gwOmbaanga ya Venduka, omusamane Adriaan Grobler Omukuluntuwiliki gwOprojeka yAagandjimayele mokutunga ya Lithon nomusamane Gert Maritz Omuwiliki gwa Lithon Project Consultants.