Elelo lya Shakati olya ti otali ka mbonyagula

MOSHIGONGI SHALYO nAatoolinkunda mOshakati mEtitatu lyoshiwike sha zi ko, Elelo lya Shakati olya ti kutya onkee tali ka tsikila nokumbonyagula po omagumbo nomatungo galwe ngoka ga tungwa shaali paveta mondoolopa moka, lyo tali indile kAakalimo yomOshakati ya kale taya tungu ye na Oopulana dha ziminwa kElelo opo kukelelwe okutunga shaa li paveta.

Elelo tali lombwele wo ooyene yomikunda noshowo ooyene yomagumbo nomapya ngoka ge li meni lyoongamba dhOndoolopa ya Shakati kaya landithe po omahala gomapya gawo nenge omagumbo kuyalwe, oshoka kaye na uuthemba woku shi ninga. Omunambelewa Omukuluntupitithi mElelo lya Shakati, Werner Iitha ta ti omikunda, omagumbo nomapya ngoka ge li meni lyoongamba dhondoolopa ya Shakati ngashiingeyi omaliko gElelo lya Shakati nooyene yago kaye na uuthemba oku ga landitha po nenge okulanditha po ehala mepya lyawo nenge momukunda moka komukwashigwana gulwe i ili, inashi ziminwa kElelo lyOndoolopa ya Shakati.Iitha ota ti kutya oshinima shika oshi shiwike nawa kooyene yomikunda noshowo kaakalimo, naamboka taye shi ningi otaye shi ningile ashike owina. Iitha ota ti Elelo lya Shakati olya hala nokuhalelela aakalimo ya kale ye na omagumbo nosho tuu omatungo galwe, ashike nee onge tashi ningwa paveta nopalandulathano. Onkee nee, Iitha ta ti, kehe ngoka taka unga shaa li paveta meni lyoongamba dhondoolopa ya Shakati na kale e shi shi kutya Elelo otali ya nokumbonyagula po etungo nenge omatungo ge, pwaa na omaongaongo.Omasiku ga zi ko, Elelo lya Shakati olya mbonyagula po omagumbo gaali mu Kandjengedi, limwe momukunda Onawa, limwe molukanda lwaMpumbu noshowo Okinde ya Mpumbu mOmpumbu moka. Ta li ti oga li ga tungwa shaa li paveta. Oshinima shoika osha uvitha oyendji nayi noonkondo, nAapumbu oya longekidha po ehololomadhilaadhilo moka taya ka gandja euvonayi lyawo sho Muni gwa Shakati a teyagula po omagumbo gaantu ngawo nOkinde yaanona, mboka pethimbo ndika kaye na we mpoka taya longelwa.Iitha ota ti Elelo lya Shakati onkee lya koneka kutya opu na natango oyendji ya tunga notaya tungu omatungo gawo meni lyOongamba dhOndoolopa ya Shakati shaa li paveta. Ta ti omatungo ngoka oga notaga tungwa kombanda yominino dhohanya, dhomeya, taya tungu mpoka pu na okweenda epandaanda nenge omapandaanda. Ta ti ominino dhohanya nenge dhomeya otadhi vulu okutopa kohi yevi, nange nee owa tunga po egumbo lyoye, otadhi vulu ngiini okupangelwa uuna dha topela kohi yegumbo nenge etungo lyoye hoka. Iitha ota ti wo kutya sho omagumbo nomatungo galwe mOshakati haga kala ge li kohi yomeya pethimbo lyomeya gefundja nomiloka ominene, oosho aantu ya tunga shaampoka, naampoka hapu ende omeya. Shoka, hashi eta omeya ga gwilile po yalwe mondoolopa, molwashoka mpoka ge na okweenda, nenge ga kala haga ende, opwa tungwa shaa li paveta, inapu pulandwa nawa. ‘ Inamu tunga we ano shaa li paveta, naangoka to ke shi ninga, kala wu shi shi kutya egumbo nenge etungo lyoye ndyoka otali mbonyagulwa po kElelo lya Shakati,’ Iitha ta ti ngawo nokugwedha ko ta ti Ooveta opo nale dhi li ndhoka tadhi ti kutya ngoka wa tunga meni lyoongamba dhondoolopa yElelondoolopa, Elelo ndyoka oli na uuthemba noonkondo okumbonyagula po etungo lyoye ndyoka. Iitha ta ti Elelo ngele olye ku mono to tungu oha li ya noku ku lombwela kokana kutya ino tunga. Oshitiyali otali ku lombwele pamushangwa kutya ino tunga, na ngele nee owa tsikile nokutunga, otali ya nokumbonyagula po etungo lyoye ndyoka. Iitha ta yelitha ta ti kutya mboka yomagumbo ga mbonyagugulwa po mOshakati omasiku ga zi ko, oya lombwelelwe pakana noshowo paembapila, ashike nande ongawo inayi utha komalombwelo noya tsikile nokutunga, sigo nee omatungo gawo taga mbonyagulwa po ngawo. Nande ongawo mboka ya mbyonyagulilwa po omatungo gawo omasiku ga zi ko mOshakati, otaya ti kutya yo inaya lombwelwa sha pambapila.Iitha ota ti kutya oya lombwelwa pakana nokupewa wo oombapila. Ta tsikile ko ta ti, omalukanda gomOshakati, ngashi Oneshila, Evululuko, Oshoopala, Uupindi, Sky, Eemwandi, Kandjengedi nOmahenene, ngeno kage po ngele opwa ningilwe Ooplana/omathaneko ge li nawa. Ta ti oge ya po shaashi kehe gumwe okwe ya po ashike ta tungu mpoka a hala na shoka a hala, nkee, Iitha ta ti, hamuntu to tungu shaa li paveta mOshakati, oto mono oshilanduli shetungo lyoye tali mbonyagulwa po kuMuni gwa Shakati meendelelo ngashi tashi vulika.