Elelo lya Ndangwa tali tidhaatidha aantu yalyo momalukanda

AAKALIMO yamwe yomOndangwa yomomalukanda ngashi Oshitapo mOnguta, Omakulukuma noshowo kOlukanda lwa Nguta pooha dhOndjondjo, oya mona elombwelo okuza kElelo lyawo lyaNdangwa kutya ya kale ya kutha po uumbashu wawo, ano omagumbo gawo nokuthiga po omahala gawo ngoka meti 1 Maalitsa 2010 molwashoka pomahala mpoka aniwa opu na okutungwa omagumbo gopashinanena.

Yamwe yomaakalimo yomomahala moka, mboka ya popiwa nayo ko The Namibian, ngashi meme Kanailonga Tuliindileni noshowo tate Wellem Nhinda na mee Hilya Nghilokwa, otaya ti kutya omwedhi gwa zi ko, elelo lya Ndangwa olya gandja elombwelo kuyo kutya naya ze po pomahala gawo mpoka manga eti 1 Maalitsa 2010 inali thika. Sho nee ya kala inaya za po, elelo olye ya nokushanga kuumbashu wawo, ano kIipeleki yuumbashu wawo noondanda oontiligane kutya oye li po shaa li paveta naya ze po. Ano pwa shangwa ngeyi; ‘ Illegal’, ko ta ku landula ‘ Remove’. Kanailonga, Wellem na Hilya, otaya ti kutya sigo oompaka inaya za po molwashoka kaye na mpoka taya yi. Taya ti Ondangwa ayihe, sho ya konaakona, kamu na we omahala gokukala. Otaya ti kutya pomahala mpoka ye li oya pewa po ku mwene gwomukunda gwaampoka tate Andreas Shikele, ngoka sho a uvu kutya otaya tidhwa po ya yi naye kElelo lya Ndangwa nokuninga nalyo oonkundathana. Ashike aniwa olya ti ashike naya ze po pomahala mpoka ya shune hoka ya zile sho ye ya mpoka. Kanailonga, ota ti yo hoka ya zile okomagumbo gaakuluntu yawo. Ya za mo ya ninga aakuluntu noya kaninga omagumbo gawo. Sho wo ya ya mpoka taya tidhwa, inaya ya po ashike ngawo, oya ninga eindilo ku mwene gwomukunda tatekulu Shikele, taya futu ooN$150 nokudhengela ihe nawa uumbashu wawo mpoka, molwashoka apehe mOndangwa kamwa li mu na ehala mpoka ya li taya vulu okudhengela uumbashu wawo. Kanailonga ta ti yo nomusamane gwe itaya longo, ohaya nyanga kuyo yene mokulanditha iinima yawo nokapana na omo haya mono sha moka sho ku ya hupitha noluvalo lwawo. Nande ongawo nee, otaya ti kutya ngeno okwa li elelo lya Ndangwa oli na ko shili nasha naantu yalyo, ngeno itali ya tidha ngawo opo li tunge po omagumbo. Taya ti ngeno otali ti ashike otali ya pe ooplota mpoka ya tunge po omagumbo gawo, nenge li ya tungile omagumbo yo taya tsikile nokufuta mpoka taya vulu.Tatekulu Shikele, ngoka a zimina kutya aantu ye sho e ya tula mpoka oye mu pa ooN$150 ngofuto, ota ti, ye sho a uvu Elelo lya Ndangwa tali tidha po aantu ye pomahala ngoka e ya pele, okwa kutha yamwe yomaantu ye nokuya nayo kElelo lyOndangwa ya ka kundathane oshinima shika. Ashike Elelo olya kala lya dhama mpoka kutya pomahala mpoka ye li, kutya nee oye e ya pa po, oye li po shaa li paveta, oshoka ehala ndjoka nenge omahala ngoka oge li meni lyoongamba dhOndoolopa ya Ndangwa noye na ashike aniwa okuza po.Tate Shikele ta ti, pOshitapo mpoka, opu na aantu mboka ya kala po nalenale. Opu na wo mboka ye ya po, sho ya tidhwa komahala gawo komeya gefundja, po opu na nee mboka a tula po ye mwene. Tate Shikele ta ti, ngeno mboka ya kala po nalenale naamboka ye ya po omolu omeya gefundja, ngeno mboka kaye na ngaa ngeno uupyakadhi wa fa waamboka a tula po, ashike nayo Elelo lya Ndangwa olya ti naya ze po, oshoka nayo oye ya po shaa li paveta aniwa.Tate Shikele ota ti, Elelo lya Ndangwa ngeno nali tale po nawa mpoka nokumonena aantu yalyo omahala gokukala shi vulithe oku ya tidhaatidha, yo kaye na mpoka taya mono ehala nenge omahala gokukala.Mokumonathana nOmunambelewa gwElelo lyaNdangwa meme Rachel Iipinge ngoka e na sha nOmathaneko gOndoolopa, okwa zimine kutya oshoshili kutya Elelo olya lombwela aakalimo ayehe mboka ya thige po omahala gawo, oshoka kaye li po paveta, oyiitula po kuyoyene. Ta ti inaya landula nande Omautho gOndoolopa ngoka taga ti kutya omuntu ngoka a hala ehala mondoolopa na ninge eindilo kElelo opo e li pewe nawa nenge e li tindilwe, ihe oyiitula po kuyo yene, ya enda Elelo pomunkulo. Iipinge ta ti na mwene gwomukunda Shikele ke na uuthemba wokugandja omahala kaantu meni lyoongamba dhondoolopa. Onkee aakalimo mboka oye na ashike okwiiyutha kelombwelo nokuza po mpoka.