Elelo lodoolopa ya Shakati la tyapula okrismesa noilema

lelo lodoolopa yaShakati okwali la unganekela ovanhu ovo tava lumbu noulema vomoshitukulwalelo shalo oitendele yoKrismesa nOmudo mupe noku va ulikila kutya vo oveli ovanhu veli xwapo novena ongushu ngaashi ove vena oilyo yeli xwapo moshiwana.

Oshivilo esho kwali shali mewiliko lOmupopiliko welelo lodoolopa meme Anna Iingwafa oshali sha ninga Etitano lomafiku 9 omwedi ou, nokwali sha ningilwa pendiki lokuvyula onghalo ounona voilema, oingudu nounona inavawanapo nawa meendunge ledina Dr. Frans Aupa Iindongo pEvululuko noshali sha kalwa komuvalu munene vovanhu tava lumbu moulema.
Eshi kwali ta popifa ovanashivilo, Kansela wOshitukulwa shaShakatiushilo Lot Kuushomwa okwa pandula eholokepo liwa lovaifanwa omanga ina holola enyeme laye mwaashi ta ifanwa ‘onghalo yokuningwa nayi noku kalwa noilema yii moshiwana’.
‘Onda hala ndi mulombwele kutya nye omuna oufemba ufike pamwe novanhu aveshe moshiwana.
Ngeenge opena ou iha koshwa, heli kalekelwa ile oimaliwa yaye oyo haidi kEpangelo iheyi pewa ile a landelwe ngoo nande eenghaku, onda hala ndi mu lombwele kutya omuna oufemba woku shi lopotako komalelo eni mwa kwatelwa opolifi, ookansela ile nande okupresidente ye mwene’, osho a tumbula nenyeme konghalo yii a mona tayi ningilwa oilema moshiwana komadimo avo vene.
Kuushomwa okwa hokolola onghalo ii hayi ningilwa oilema ihapu kovakwanedimo omolwa onghalo yavo.
Okwa hokolola nghee oilema ihapu hai pandekwa, hai li kalekelwa, tai lile mumwe neembwa ile ihai filwa oshisho nandoo otuu. Okwa indila oinima yatya ngaha i mone ehulilo moshiwana shetu.
Kuushomwa okwa holola yoo kutya Epangelo ole li tula mo mokuyambulapo ong halo yoilema ngaashi melongo, monghalonawa monghalafano noshotuu.
Okwa udanekela oshiifanene kutya Epangelo otali twikile nokuxumifa komesho ovakwashiwana ava mokuyambulapo eemhito doilonga kwaavo velihonga meefikola, veshi oilonga yonhumba noshotuu.
Omupedumayola waShakati tatekulu Skinny Hilundwa palufo laye okwa yandja omahalelomawa odula ipe adja kelelolodoolopa.
Okwa hokolola kutya elelo laShakati olili leli tulamo monghalonawa yoilema noli udite onghenda ya kula omolwa onghalo idjuu omo oilema hai dulu oku li hangamo, mwa kwatelwa efundja linene letaula lali mOshakati odula ya djako.
‘Efundja lali modoolopa yetu omudo wa djako olali lidjuu neenghono kovanhu aveshe unene tuu kwaavo tava lumbu noulema’, osho a hokolola efundja ngaho.
Okwa shilipaleka yoo oilema kutya elelo ole litulamo moku yambulapo onghalo yavo. Okwa indila ovanashivilo va kale ovanhu vawa, vo va twikile nokulonga noudiinini mu keshe tuu osho tava longo momudo ou okuninga eefikola ile oilonga.
Omukulunhuwiliki wendiki eli lina ounona 22 mopaife omolwa omhumbwe meme Aili Shilongo, okwa popifa ovanashivilo nokwa holola yoo efano lii olo ovanaulema ta veli hangemo, onghalo oyo natango tayi endifa noudju omandiki omavyulonghalo mwa kwatelwa yoo eli.
‘Otwe li hanga monghalo omo oilema ya ningwa ovakwashiwana ovativali moshilongo. Ovadali vamwe ihava talelepo ovana vavo, ihave etele oikulya, eefuto dofikola nayi hapu. Ovadali vahapu ohave tu lombwele kuty itav dulu oku futa eefuto dofikola ile oipumbiwa ikwawo molwaashi ova futila omayakulo aa kounona ava veli nawa’, osho meme Shilongo a hokolola nenyeme.
Okwa indila opo oshiwana nomahangano oohandimwe va yambidide endiki eli opo li longe oilonga yalo ngaashi la kala noku shi ninga monakudiwa.
Okwa pandula omahangano mahapu mwa kwatelwa noohandimwe ovo veli tulamo moku yandja omayambidido kendiki eli.
Kolukeno nokeshongo ladja momapopyo a meme Shilongo, Kansela Kuushomwa oo luhapu hau ilike ena omutima muwa novanhu tava lumbu noulema okwa yandja N$100 li kalongifwe noku wedakanifwa moku landa eemhumbwe dendiki eli.
Konima yoipopiwa, ovafimanekwa ava vavali ova yandja oupakete vomaano koilema payambidido laKansela Loise Shivolo ou yoo a li poitendele kwaaveshe ovo vali va holoka. Oitetelekela oya li ya longekidwa kelelo lodoolopa yaShakati.