ELCIN a gandja N$100,000 koonakuhepekwa kefundja

ONGELEKA ya ELCIN omasiku ga zi ko oya gandja omagano gOoN$100,000 kOmbelewa yOkuungaunga nOonakuhepekwa kOmeya gEfundja, ga pewa Omukuluntu gwOmbelewa ndjika omusamane Erastus Negonga, ngoka wo e li Amushanga gwUuministeli nwOmapangelo gOpaitopolwa, Omagumbo nEhumokomeho lyIitopolwa yokomikunda.

•OSWALD SHIVUTE
Pethimbo ta gandja omagano ngaka komusamane Negonga, Amushangandjayi gwa
ELCIN Omusita Eliakim Shaanika, okwa ti kutya Ongeleka ya ELVCIN ndjoka
oyo yi li onene mOshilongo, yi na omwaalu gwiilyo omayovi omathele gaheyali lwaampoka, onkee yi li ikwatelela koshinakugwanithwa shayo shokuyakula mombinga yonkalonawa yoshigwana, pwaa na ondjoolola.
Omusita Shaanika ta ti ondjodhi nenge elalakano lyOngeleka ya ELCIN olyo okuyakula oshigwana sha Kalunga pakuudha, ano oku shi kwathela koompumbwe dhasho dhesiku kehe opo shi dhimbulukwe ohole onene ya Kalunga kasho, sho e shi hole ngeyi noku shi tula wo ponkatu shi kale shi ihole shoshene.
‘Nena, ELCIN ota shongo oshiponga shika shomeya gefundja mokati koshigwana. nomOnkalo yatya ngeyi, Kalunga ota ti;’ Uuwanawahole woye nau monike kwaayehe,’Omusita Shaanika ta ti ngawo nokutsikila ko ta ti ishewe kutya ELCIN okwa hala okukala gumwe gwaamboka taya gandja ekwathelo kwaamboka ya gumwa noya monithwa iihuna komeya gefundja, ashike nee nashi kale sha konekwa kutya ota gandja ashike okashona hoka e na po, oshoka oku na oonzo dha ngambekwa lela.
Omusita Shaanika, ta lombwele tate Negonga kutya, Ombelewa ye ngiika, oya li ya tegelela a gwedhe ko kwaashoka a pele natango oonakuhepekwa komeye gefundja omvula ya zi ko, shOondola/N$200,000. Ta ti nuumvo hasho, nOngeleka otayi gandja ashike etata lyaashoka ya gandjele omvula ya zi ko, ano OoN$100,000.
‘Omumvo nongola, ngashi OmuAfrica ha ti,’ Omusita Shaanika ta ti ngawo nokuyeleka ta ti kutya Ongeleka oyi na lela iiyemo nya ngambekwa, ashike oya kutha mo ngaa okashona hoka yi na po ka pe aantu yayo mboka ya monithwa iihuna komeya gefundja ngaka.
Omusita Shaanika ta lombwele tate Negonga kutya, ELCIN okwa hala nokuhalelela okashona hoka a gandja ngeyi, ka kalongithwe naanaa ngashi ka gandjelwa, ka ka yakulithe oonakuhepekwa komeya gefundja mIitopolwa yokuumbangalantu ngashi Omusati, Oshana, Ohangwena, Oshikoto, Okavango noCaprivi.
Negonga okwa ti osho naanaa taya ka ninga. Ongeleka ya ELCIN tayi indile
kOongeleka oonkwawo noshowo kOmahangano gOongeleka nokaantu ayehe ye na ehalo ewanawa nayo ya ninge ngashikwawo nokukwathela oonakuhepekwa komeya gefundja mbaka, molwashoka Omishangwa Omiyapuki otadhi ti, ‘Onda li nda sa ondjala, ndi na Okolera, nda monithwa iihuna komeya gefundja, nda sa omeya, nda kungululwa po komeya, ihe ino ninga ko sha koompumbwe nokuudhigu wandje,’Omusita Shaanika ta ti ngawo.