ELCIN a gandja esimaneka kOmusita omukulu Titus Heita

Amushangandjai gwaELCIN, Eliakim Shaanika okwa hokolola omusita Titus Heita kutya ye okwa li omulongisikola paithano a longa nuuladhi oshilongayakulo she mEgongalo Nakayale melala lyomimvo omilongombali nayimwe (21).

‘Omimvo ndhoka okwa kala enkuma lyonkundana ombwanawa yElaka lyEvangeli,’ ELCIN ta ti ngawo okupitila mOmusita tate Shaanika.Ta gwedha ko ta ti; ‘Pasilohenda lyaKalunga okwa piti moshikako oshipyu noshidhigu shemakelo pethimbo a kala oshilyo mEpangelo lyOwambo pomimvo 1968 sigo 1988. ELCIN ota hambelel Kalunga sho oshingoli shika inashi lungunina meziko ndika lyemakelo. Esilohenda lya Kalunga ndyoka lya kala noku mu gwanena pombanda muunkundi we, olyo tatu itangele nena sho tatu dhana oshituthi sha hugunina shOmusita Titus Heita,’Amushangandjai gwOngeleka ya ELCIN Omusita Eliakim Shaanika ta ti ngawo pehala lyongeleka ya ELCIN.Pethimbo ta lesha ondjokonona ya nakusa tatekulu Titus Heita mOshituthifumviko, omusita Josaphat Shanghala okwa ti nakusa Titus Heita okwa longela egongalo lya Nakayale oshindji lela. Ta ti, okwa tunga oshigandhi shegongalo, Oshinyanga, Ongeleka ndjoka onkulu ya Nakayale, ya thikama sigo onena, nonando ya gwile po lwaali, ndele te yi shuna po, shoka sha li nokuli she mu etele uunkundi womutima, mboka owo tashi vulika we mu faalele.Okwa tunga wo Oosikola dha Nakayale, ndjoka yopevi naandjoka yopombanda. Ta tungu Egongalo lya Nawa, lya Eengolo nolya Eengoma. Ta tungu Iinaagoga, ngashi shoka sha Onangholo, Omhakoya nEpoko. Okwa longa wo miilonga yEtumo ngashi unene kOshangalala ko Angola nokOmindamba.Sho a kala mElelo lyOwambo okuza momumvo 1968 sigo omomumvo 1988, okwa kala Ominsita yOshikondo shEmona, moka a li a enditha uunangeshefa mOwambo pethimbo ndyoka.Te ya ta ningi omukuluntu gwOshikondo shUuyuki nokonima ta ningi Ominsiteli yOshikondo shElongo, Omithigululwakalo nOmaudhano, moka a tungitha Ooseko oonene ngashi ndjoka yaDavid Sheehama, Oseko ya Ngandjera, ndjoka yomUukwaluudhi naandjoka ya Ponhofi pOhangwena. Okwa li wo, pethimbo ndyoka, Ominista yUuhaku niilonga yUundjolowele nokwa tungitha Oshipangelo sha Kamhaku mOutapi mOmbalantu, Oshipangelo sha Kahao mOngandjera naashoka sha Tsandi mUukwa-luudhi.