Elanditho lyiipala na li kundathanwe

OPWA pumbiwa okutalika iinima ya yooloka, ngaashi mbyoka yopaveta, pankalathano nopamahupilo, mekwatathano nelanditho lyiipala opo pu vule okutulwa omulandu noshowo pukonakonwe ompito yokweetapo oveta ndjoka ta yi kondolola, ta yi keelele, nenge ta yi shonopeke elanditho lyiipala moshilongo.

Minista Guundjolowele , Richard Kamwi sho a popi moparliamende oshiwike sha yi okwa ti osha pumbiwa opo oshinima shika shitalikeko nuukeka nonomeho gopaithano opo pwaadhike omukalo omwaanawa gwokushimonena eyamukulo, shi ikwatelela kuuyelele nuumbangi okuza momudhingoloko.Okwa ti pamwe naashika, omaipulo kombinga yuundjolowele wopashigwana noshowo HIV-AIDS nago oge na okutalikwa ko.Minista yaagundjuka, Omaudhano noohedhi, Kazenambo Kazenambo okwa tile na pa ningwe oveta ta yi pitike elanditho lyiipala moNamibia.Kazenambo okwa ningile ethaneko ndika pethimbo lyoonkundathana kondungedhiladhilo kombinga yo HIV-AIDS ndjoka ya li moompata megumbo lyopashigwana. Eindilo lye olya li lya nyenyetwa okuziilila momahangano gaashi gepangelo noshowo kOngongahangano yoongeleka moNamibia. Kazenambo pethimbo a li ta popile osheetwapo she okwa tile elanditho lyiipala olya indjipala moshilongo naanenentu ya Namibia yamwe ohaya landa iipala, naashika oshi na okutalika ko ongo omukalo gumwe okwiimonena iiyemo unene kaakadhona naakiintu mboka ya hala okufadhuka po oluhepo.Omukokoli peresidende, Sam Nujoma naye okwa pangula eindilo ndyoka lyoku ninga iilonga yomilalo iilonga paveta, oshiwike sha yi omanga a li ta popi poshiithanene shimwe moshilandopangelo.Metitatu Minista Kamwi okwa ti elanditho lyiipala osho eshongo lyopankalathano noshowo omukalo gwelongitho lyoonkondo ta li ningilwa aakiintu unene tuu elanditho lyiipala kaakiintu. Okwa ti ishewe oshinima shika kashili paiyuvo lyomuule, no ka shili paveta.Kamwi okwa ti otashi vulika ishewe onkalo yokudhinika nokuulikwa nomilungu kutya mboka oyo ookugulu kwoponda otashi ya kutha uuthemba wawo oku mona omayakulo gopaundjolowele, nopethimbo olyo tuu ndyoka ota pa shunithwa pevi elando lyiipala naashika otashi gandja ompito kaalandithi yiipala ya ethepo iilonga yawo.Okwa ti oshinima shika osha kitakana nosha pumbwa oku kundathwanwa sha manamo pompito yilwe yaashi ndjoka ye a li ta popi kombinga yo HIV-AIDS.Konima yeindilo lya Kazenambo kutya na pu tulwe oveta tayi mpangopaleke elanditho lyiipala , omupopi gwopevi moshigongi shopashigwana,Loide Kasingo okwa lombwele egumbo kutya oshinima shoka osha simana onkene osha pumbiwa okweetwa megumbo ongo osheetwapo.