Elanditho lyiimuna mointernet ewanawa

ELANDITHO lyiimuna okupitila mondjandjo yomakwatathano[internet] oya etele aaniimuna uuwanawa owindji. Omukalo nguka ngashingeyi ota gu longithwa kaamuni yiimuna oyendji okulanda noshowo okulanditha iimuna.

Omukalo nguka ogwa tulilwe miilonga kehangano lyAgra konima ashike yomasiku omashona, nelalakano oku endeleleka okulanditha nokulanda iimuna .Sigo oosho omukalo nguka inaa gu tulwa miilonga aanangombe, aananzi, aaniikombo nosho tuu oya kala haya landitha nenge ha ya landa piigunda yomalanditho pomahala gi ili no gi ili moshilongo ashihe.Pamalanditho ngaka iimuna yomwaalu gwontumba oya landithwa nale.Mbyoka ya landwa pwa tikila oodola odhindji oombyoka sho ontsezi yoludhi lwo mbalamana yedhinaClawa ya landithwa po kumwene gwayo koodola 48 600.Ontsezi ndjika oya munwa komuniimuna Mecki na Brigitte Schneider yopofaalama ya Okabra Brahmans, na oya landwa komuniimuna Hendrik Blaauw nomwana mati, Pieter.Blaauw okwa li a landa ontsezi omwana ya Clawa pomalanditho gamwe gokuumbangalantu omanga inaa tokola a lande ontsezi ndjika. Okwa landa ndjika omolwa uukwatya uuwanawa pamuthika gwoshimuna naa sho iimuna mbika ha yi landwa kondando ombwanawa.Pethimbo lyomalanditho ngoka oontana mbali dha valwa ku Clawa odha li dha landithwapo kondando yoodola kumwe adhihe 126 000.OoBlaauw ota ya munu noongombe dholudhi lwo mbalamana na oya tala kutya uukwatya waClawa uuwanawa okuoopaleka oshigunda shawo.Omanga ya li pomalanditho giimuna ga Agra muumbangalantu oya uvu omalanditho pandjandjo yomakwatathano[internet].Okuza mpoka Pieter okwa longitha ointernet okulanda Clawa, okwa li ta thigathanapo mokulanda Clawa nomunangombe omukwawo gumwe. Sigo oosho oye a gandja omwaalu gwopombanda.Okwa kumike aanangombe ayehe moshilongo ya longithe omukalo nguka gwokulanditha nokulanda iimuna.Okwa ti omukalo nguka omwaanawa oshoka ota gu gandja ompito kaanangombe ya vule okutseyitha kutya oye na oongombe dhokumuna dhithike peni nota dhi gu iimaliwa yithike peni.Oshikwawo Blaauw okwa ti oshaanawa oshoka oongombe ina dhi hingwa dhi falwe kiigunda yokulandithila, shika osha hupitha ethimbo, noshowo ongombe ina yi tulwa muudhigu wokweendithwa oshinano oshile.