Elanditho lyevi shaali pampango lya pangulwa

OMUPANGULI mompangu yopombanda okwa popi nayi kombinga ye landitho lyevi momukalo gwekotokelo.Elanditho ndika olya kwatela mo omunafaalama gwopoGobabis, omutseyimpango nomukwashigwana gumwe gwa South Africa.Mbaka ota ku tiwa oya landitha evi ya longitha omukalo gwafa ando evi ndika lya gandjwa pa ku li hehela, elalakano olyo kwa li okupita oshipumbiwa shompango yevi pombambo.

Metokolo lyompangu muNovomba 2009, omupanguli, Sylvester Mainga okwa pangula omwiindili noshowo omuyamukuli moshipotha, sho ye ya kompangu niikaha yanyata tati mbaka kaya li ye na okupulakenwa, na oya li ye na okweethiwa opo ya potokonone evundakano lyawo yoyene.Omunafaalama, Jan-Harm Labuschagne, okwa kongo ekwatho lyompangu yopombanda neindilo lyeendelela, konima sho omukwashigwana gwa South Africa, Waldermar Strauss, a ndopa oku futa iimaliwa ye yotango koofaalama mbali moshitopolwa sha Gobabis, ndhoka a li a landa ku Labuschagne.Eindilo lya endelela olya li lya ningwa sha kankamekwa kelanditho lyoofaalama ndhika, dhomukulupe Labuschagne.Oofaalama, Haarlem na Sukses odha landithwa koodola oomiliona 8,7 oshowo omunampango ngoka a nyola euvathano okwa pewa okommisi yoodola 100 000, nembakumbaku lyongushu yoodola 70 000.Ben Venter okwa pewa mbika molwaashoka oye ashanga euvathano.Omupanguli Mainga okwa ekelehi euvathano nokwa ti kali na oonkondo dha sha.Okwa lombwele mbaka kutya mbaka oya li yeshi kutya otaya longo shoka sha puka, onkene inaya pumbwa oku nyenyeta sho euvathano lyawo lya yonuka.Omupanguli okwa ti euvathano ndyoka lya ngongwa po ku Bennie Venter ota li gandja eiuvo lyafa kutya lyo oshinima shokuhehela omanga paushili wo wene shika osho euvathano lyokulanda.Mainga okwa ti elalakano lyaambaka olya li okulanditha nokulanda ndele ondando yokulanditha oya ulikwa ya fa omukuli.Okwa ti euvathano ndika olya yono okatokolwa oka 17 kompango yevi, na olya li nelalakano oku henuka shoka sha tegelelwa okuningwa pampango.Ompango oya tegelela kehe omunafaalama a hala okulanditha po ofaalama ye, tango okuna okulanditha ndjika kepangelo, mwaashika shika osha henukwa no inashi ningwa nando.Omupanguli Mainga okwa ti ina ekelahi eindilo oshoka ka li eshi ngele Labuschagne okwa li e uviteko iilanduli yoshinima shika kaashili pampango.Okwa ti otashi vulika Venter inaa fatululila nawa Labuschagne kombinga yomwiityo gewuvathano moka ta yi.Labuschagne okwa indile ompangu mu February, konima sho Strauss a ndopa okufuta iimaliwa yotango ngaashi sha uvathanwa mbyoka ya li oodola omiliona 1,5.Euvathano pokati kaambaka yaali olya li lya ngongwapo ku Venter lwopehulilo lyomumvo 2008, konima sho Labuschagne a tokola a landithe po oofaalama dhe dhili mbali.Euvathano ndika olya tungwa po ku Venter konima sho Labuschagne aniwa a li a pula uuyele nkene ta vulu okulanditha oofaalama dhe ta henuka iipumbiwa yompango kutya oofaalama ne dhi lombwele epangelo tango kutya otadhi landwa.Pamishangwa Venter ota ku tiwa okwa kwashilipaleke Labuschagne kutya euvathano ngaashi lili olili pampango. Omupanguli Mainga okwa ti euvathano ndika kombinga yondando ota li piti ngiini inaa li taaguluka ompango yoA gricultural Land Reform Act.Okwa hokolola woo kutya, Labuschagne okwa lundulula etestamendi lye epe eta ningi Strauss oye omuthigululi gwe.Mainga okwa ti pakutala omalongekidho agehe ngaka, otashi ulike kutya, mbaka oya li ya hala okulanditha nokulanda.Strauss na Venter oya lombwelwa ya fute iimaliwa omolwa eindilo ndika, neuvathano ndika olya ekelwahi.