Ekwatathano pokati ka O&L na Kempinski

OPENA omaipulo kombinga yonakuyiwa yomakwatathano pokati kehangano lya Ohlthaver & List naandyoka lya Kempinski.

Omaipulo oga holoka konima sho ewiliko lya O&L lya tidha miilonga aawiliki yoolodga poMokuti na Midgard oshiwike shayi. Ota ku tiwa onkalo yomahupilo moshilongo oyo yeeta opo aaniilonga mboka ya li ha ya wilike oolodga ndhoka ya lalekwe miilonga mbyoka.Ehangano lyoohotela lya Kempinski Hoteliers olyo lya pelwe okondalaka yokukwatela komeho olodga ya Mokuti pehala lya O&L momumvo 2008 noshowo ndjoka ya Midgard Country Estate momumvo 2011. Oshiwike sha yi omunashipundipitithi gwa O&L, Sven Thieme aniwa okwa tidha miilonga aawiliki yahamano ya za pondje, a ti shika okwa thiminikwa eshi ninge omolwa onkalo yomahupilo moNamibia yaa li nawa. Omishangwa dhi li miikaha yoThe Namibian odha ulike kutya aawiliki mboka oya lombwelelwe ya shunithe iipatululo, uuyelele, omishangwa, oomemorandum, nayilwe noshowo omaliko agehe yena ga O&L omanga ontano yokomatango inaa yi dhenga momasiku 29 gomwedhi gwayi.Aawiliki yonale mbaka oya geya oshoka iilonga yawo oya hulithwapo inaa ya pewa etseyitho lyoomwedhi ndatu, pehala lyomwedhi gumwe ngoka ya pewa, na ogo owala taya ka futwa oondjambi dhawo. Omupopiliko gwa O&L, Roux-Che Locke okwa henuka epulo ngele oshinima shika otashi ulike kutya ehangano ndika enene oli li muudhigu pashimaliwa. O The Namibian oya li woo ye mu pula kutya elundululo ndika ota li ka guma ngiini iitopolwa yilwe yongundu yomahangano ngoka.Locke kepulo okwa ti iilonga yongundu yomahangano ngoka oha yi talululwa ethimbo nethimbo , nuuna sha pumbiwa oha pa etwa omalundululo opo pu hwepopekwe onkalo yiiyemo noku mona oprofita oyindji. Sho a pulwa kombinga yetidho lyaamboka ya hamano , Locke okwa ti uuyelele wu nasha naaniilonga owu li oshiholekwa, onkene itawu vulu oku kundathanwa.Na ina vula oku tsikila okutya sha koshinima shika mokati koshigwana.Locke okwa ti nando opena oshinima shatya ngaaka ekwatathano ngoka ga O&L na Kempinski ina li lunduluka. Okwa ti opena omalunduluko gontumba gena okuningwa meuvathano ga hwepopekwe nokuukiililithwa nawa.Locke okwa ekelehi woo oohapu ndhoka dha lundilwa Thieme kutya okwa lombwele, Warren Gaudby opo a kuthemo omufuko gwe omuluudhe molodge. Okwa ti ndyoka olyo owala elundilo lyaana omakankameno gasha. Otaku hokololwa Gaudby a kala nomuyalekwa gwe gwomuluudhe polodga ya Mokuti. Locke okwa li woo a henuka oku gandja omayamukulo guukilila kepulo kutya, omuniilonga pombuulaye ya Namibia, Caroline Guriras okwa tidhilwa shike, a ti shoka oshinima shopainekelo na ihashi tomonwa mokati kaantu. Etitano lya yi oshifo shimwe shoko shiwike osha kundanekele kutya Guriras okwa tidhwa miilonga pombuulaye, molwaashoka oku na ekwatathano nehangano lyomatseyitho lya DV8 Saatchi&Saatchi. Ombuulaye oya li ya tula Guriras pevi mu January nuumvo tayi mu tamanekele oku gandja uuyelele wopainekelo kehangano ndyoka, shina sha notendela yomatseyitho na nkene ehangano ndyoka tali vulu okulonga opo li sindane oku mona iilonga mbyoka.Pashikundaneki shoka , Ombuulaye aniwa oya lundile Guriras kombinga yokulya oompandambali noku mutula pevi ya fekele kutya oye a yakele DV8 uuyelele. Ehangano ndyoka oha li gandja omayakulo kombuulaye. Ombuulaye otaku tiwa oya uvu ekwatathano pokati ka Guriras na DV8 sha ziilile kenyenyeto okupitila mokaketha komathaneko kehangano lyomayalulo lya Deloitte and Touche, ndyoka olyo ha li longo nomanyenyeto taga ningilwa Ombuulaye. Ehangano lya Mbuulaye olya li lya fekele kutya Guriras oye a yakeleko, DV8 nkene ena okweenda moku gandja omathaneko ge kombinga yomayakulo ngoka ombuulaye ya pumbwa oku pewa. Mbuulaye okwa lundile woo Guriras kutya okwa li a pe DV8 oobonasa dhoku longa pethimbo ye a li omuwiliki gwembo lya Tafel Lager.