Ekwaito pomutima lyonkalo yaakiintu taya dhipaga oohanona

Muule wiiwike itatu ya piti omwa lopotwa onkalo tayi limbilike yaakiintu taya dhipaga aanona yawo mbala konima yepulumutho.

Moshiningwanima oshitalala, komanda gwopolisi yaShikoto, Theopoline Kalompo-Nashikaku, okwa tseyitha onkundana yomukiintu gwomimvo 26 ngoka taku hokololwa a pulumutha okanona nokwe ka dhipaga sho e ka manga noshikayiwa nokasi oshimpwininika.

Kalompo-Nashikaku okwa popi kutya omufekelwa okwa li e na etegelelo ashike lwanima okwa ka monika keeli na we naashoka okwa li she eta omalimbililo molwashoka ke na sha okanona.

“Okwa tula omudhimba gwokanona moplastika nokwe yi holeke membamba lyiikutu. Konima yoshiningwanima shoka, kuume ke okwe mu talele po nokwe mu pula wo mpoka etegelelo lye lya yi, ashike omufekelwa ina yamukula sha. Kuume ke okwa lombwele he yomufekelwa, noshinima shoka osha tseyithilwa opolisi.

“Omakonakono ogu ulike kutya okwa kutha mo etegelelo nokwa dhipaga ohanona,” osho Kalompo-Nashikaku a popi ngaaka. Omufekelwa okwa tulwa nale miipandeko nokwa holoka mompangu mEtitato.

Okundana ndjoka oya landula ndjoka ya kundanekwa omasiku ga zi ko moka omukadhona gwomimvo 18 ngoka e li mondondo 11 posikola tayi adhika momudhingoloko gwaElim moshitopolwa shaMusati taku hokololwa a tulwa miipandeko sho a dhipaga omwana, ano ohanona ndjoka opo a mono.

Omukwatakanithi gomakonakono giimbuluma moshitopolwa shaMusati, Malakia Simaho okwa popi kutya kakadhona ngoka okwa li a pulumutha okanonamati momuhandjo gwosikola, momasiku 18 Mei.

“Okwa mono okamati nokwe ka hwele mokana oombapila dhokokandjugo nolwanimwa okwa mangele okanona hoka mokambindja nokutula omudhimba gwohanona meyemele. Omufekelwa okwa holeke omudhimba gwohanona mosikopa yomondunda ye momuhandjo, ngoka lwanima gwi itsuwika kaanasikola yalwe sho ya landula ombinzi ya ndonda okuza kokaiyogelo,” osho Simaho a popi ngaaka. Shoka oshe eta omufekelwa a tulwe miipandeko.

Omufekelwa okwa holoka mompangu yaMangestrata gwOutapi, mEtitano.

Iiwike iyali ya piti, onzonkundaneki ndjika okwa li ya kundaneke kombinga ya komanda ta kwathele mopolisi yaKavango Uuzilo, omupevikomufala Eino Nambahu ngoka a koleke oshiningwanima shomukiintu ngoka a tulwa miipandeko sho a pulumutha nokwe ekelahi ohanona ye.

Okwa popi kutya oshiningwanima shoka osha ningwa momasiku 8 Mei lwopotundi 12h00, nomukiintu ngoka okwa patululilwa oshipotha shokweekelahi okanona mopolisi yoshitaasi shaRundu.

“Otaku hokololwa kutya omufekelwa okwa pulumutha okanona mondunda ye nolwanima okwe ke keekelehi melambo lyokandjugo. Okanona hoka okwa li ka dhimbululwa komukwashigwana gulwe ngoka kwa li a hala okulongitha okandjugo hoka nokwa li u uvu okanona taka lili,” osho Nambahu a popi ngaaka.

Okanona hoka okwa li ka hupithwa sho ka kuthwa mo melambo lyokandjugo nomwenyo notaku hokololwa taka mono uuhaku moshipangelo shaRundu metonatelo lya yina.