Ekunku lya H1N1 lya kwata aavu 66

IININGWANIMA iipe yuuvu wekunku lyo H1N1 oya kolekwa moshilongo mosoondaha. Etseyitho ndika olya eta omwaalu gwaantu ayehe mboka ya alukwa ekunku lyo H1N1 paavu ayehe kumwe 66 moNamibia.

Omunashipundi shongundu yeilongekidho, omundohotola Jack Vries okwa ti yatatu yomwaamboka ya pangwa oya za moshilando sha Grootfontein nomuvu gumwe okwa za kOshakati.Aanuuvu yopoGrootfontein oyo aanona gwoomvula 8, 9 noshowo 12, omanga mOshakati omukiintu omugundjuka okwa pangwa molwa uuvu mbuka.Vries okwa ti natango omayamukulo goosampula 13 oga tegelelwa oku za koSouth Africa, Oyendji yomwaamboka ya li ya pangwa nenge ya monikwa uuvu mbuka oya aluka nale.Sigo oompaka opwa li ashike omuntu gumwe a si molwa omukithi nguka, omulumentu gumwe pOshikango.Ehangano lyUukalinawa Muuyuni(WHO) natango ota li landula nkene uuvu mbuka ta u inyenge muuyuni auhe, nonando iilongo oyindji oya hulitha po okulandula einyengo lyomukithi nguka.Pa miyalu dha hugunina iiningwanima 300 000 ya kolekwa palaboratorium oya tseyithwa muuyuni auhe miilongo 191.