Ekotampango nali simanekwe: RDP ti indile

ONGUNDU yo RDP oya shangela omukanda kOmupresidende Hifikepunye Pohamba moka tayi mu indile a gandje elombwelo koshigwana she, unene tuu kaaleli yo Swapo yamwe ngashi unene mboka yomOshitopolwa sha Hangwena ya kale taya simaneke Ekotampango lyoshilongo kumwe naashihe sha shangwa mo.

Engathithi enene lyAakwaRDP mOsoondaha ya zi ko olya ningile Omaashinga pEenhana tali yamukula kwaashoka sha popilwe kOngundu yAanyasha yo Swapo sho ya ningile wo nayo Omaashinga mEenhana moka meti 3 Apilili 2009, tahyi nyenyeta kutya Omukuluntusikola gwOseko yOpombanda ya Haimbili Haufiku omusamane Dineinge Sheya, yo nOmukuluntu gwOmuhandjo mOseko ndjoka Hafeni Mwahafa ohaya kutha aanasikola ye mOseko moka noku ya fala kiigongi nokoomaashinga dhOngundu yo RDP, ngashi unene aniwa ey ya falele komaashinga yo RDP ya li mEenhana mOsoondaha yeti 29 Maalitsa 2009.
RDP ta ti oshinima shoka kashi shi shoshili, naanasikola ya yile ko komaashinga ndjoka oya yile ko kuyo yene, komaiyuvo gawo yene, inaya thindilwa ko nande nande n gashi aanyasha yo Swapo, kumwe na Kaansela gwa Eenhana omusamane Nehemia Haufiku taya ti.Swapo momukunda gwe ngoka a gandjele ku Gavena ya Hangwena tate usko Nghaamwa, okwa popile mo wo ta ti kutya mOshitopolwa sha Hangwena omu na aaniilonga yEpangelo, unene mUuministeli wElongo noyElelo lyoshitopolwa ye li mo RDP, notaya longo ompinge nOmalalakano gEpangelo lyo Swapo.
RDP, momushangwa ngoka a shangela neOmupresidende Pohamba, gwa leshelwa iikundaneki noshigwana sha li kEenhana hoka mOsoondaha ya zi ko ku Amushanga gwoRDP mOshikandjo sha Eenhana, Ndawedwa Mwadingi, ota ti okuuvite kutya Namibia okwa mangulikila aantu ye ayehe nokuuvite kutya omauthemba gopakota gemanguluko, eigidho lyuuthemba womuntu noshowo Ekotampango oyi na okusimanekwa nokugwanithwa po kukehe gumwe.
Omukanda tagu ti kutya omaashinga ya ningilwe kOswapo mEenhana meti 3 Apilili 2009 mewiliko lya Kaansela gwOshikandjohogololo sha Eenhana omusamane Haufiku nongundu ye, oya li eyono enene lyuuthemba wAanamibia okugama koongundu ndhoka ya hala, eyono lyuuthemba wokwiinyenga komuntu ngashi a hala moNamibia noshowo eyono lyuuthemba womuntu a kale ta pulakene nokuninga oopolotika dhe dhombili mu Namibia lya manguluka.
Omukanda tagu tsikile ko tagu ti kutya omapopyo nee ngoka ga shangwa momukanda gwo Swapo mOsoondaha ndjoka pawiliko lya Kaansola Haufiku, itaga vulu nande okwiidhidhimikilwa molwashoka oguudha iifundja iitokele nomalundilo omanene. ‘RDP ke li nande ponkatu yokuhasimaneka aawiliki yoshilongo, onkee okwe ya simaneka noonkondo na ke na esiku e ke ya tuke. Kaansela Haufiku, ngoka a kala ta ti kutya RDP okwa tuka aawiliki, sho a mpulwa ko RDP a popye kondandalunde kutya okwa tuka aawiliki oolye na okwe ya tuka a ti shike, nenge ngiini, okwa faila thilu okuholola puuyelele kutya okwe ya tuka a ti ngiini na oolye ya tukwa nokwa kala ta hondama nokupopya iinima yaafele, mbyoka kayi shi yoshili, oshoka ke na uumbangi mboka tau ti kutya oolye ya tukwa na oya tukwa kwa tiwa ngiini. Okwa gongelela aantu esiku ndyoka aniwa e ya lombwele kutya RDP okwa tuka aaleli yo Swapo a ti ngiini, ashike ine shi popya, molwashoka kapu na sha shi li ngawo, okwa lombwele ashike anatu iinima yaafele.
RDP ta ti kutya ye okushi omalandulathano, ina fa Swapo, unene ngoka gwomOhangwena, ngoka ke ga shi. Ta ti RDP ka ninga iigongi yOpolotika pomathimbo giilongayakulo yoshigwana pambelewa nosho tuu molwashoka ina hala oku yi ya moshiplala, ngashi Swapo he shi ningi, ano ta ningi iigongi nomaashinga dhe nopomathimbo giilonga nokuya ngeyi iilongayakulo yoshigwana moshipala nenge ootundi dhaanona yosikola moshipala nokuhepitha oonzo dhEpangelo.
RDP ta ti Iilonga yEpangelo oyAaniilonga ayehe yomEpangelo na kayi shi ashike yiilyo yoSwapo nenge yaayambidhidhi yoSwapo ayeke, ngashi Aaleli yOswapo yomOhangwena ya hala okutya. RDP ta ti kutya yo yomoRDP oye shi noya simaneka omautho giilonga yEpangelo na kaye na nande esiku limwe ye ke yi vundakaneke noku yi ya moshipala uuna taya ningi Oopolotika dhawo moshigwana.
Taya ti kutya yo aluhe oye na okutala kutya iilonga yawo yOpolotika yawo otaye yi ningi momahuliloshiwike,momasiku gomafudho gaayehe nomoowili ndhoka dhaashi dhiilonga. ‘Inatu itaala wo mokorupushena/miilonga yuulingilingi nomehepitho lyomaliko gEpangelo notatu shongo Kaansela Haufiku a popye puuyelele nokugandje uumbangi wiihwapo nawa kutya okwa mona shili iihauto yEpangelo tayi hepekwa notayi longithwa kAanambelewa okuya kiigongi yo RDP nenge okukahwahwameka piigongi yo RDP.
‘Swapo ke uvite ko nawa kutya Uudemokoli oshike, omolwaasho ta ningi iinima itayi tsu kumwe nUudemokoli nokwa pumbwa nee oku wu longwa. Swapo okwa pumbwa wo okulombwelwa nokulongwa kutya Epamngelo lya Namibia kali shi ashike lyAakwaSwapo, olyaantu ayehe,’ RDP gwe ta ti ngawonokutsa omukumo Omupresidende Pohamba a tsikile ta longele nokuyakula oshigwana ashihe sha Namibia shi thike pamwe, kutya nee osha yooloka moongundu dhOopolotika nosho tuu.
‘Ashike otatu ku indile nesimaneko enene, ongOmupresidende gwa Namibia nogwoSwapo, wu kumagidhe Swapo nou mu lombwele shoka shi li mondjila naashoka kashi li mondjila,’ omukanda gwo RDP tagu ti ngawo nokutsikila ko tagu lombwele Presidende Pohamba kutya, yo yo RDP ota ye mu yambidhidha moonkembadhala dhe adhihe dhokweeta po ombili noku yi kaleka po, okukaleka po moNamibia na Kalunga ne tu yambekeni atuheni,’RDP ta ti ngawo.