Ekondjitho lyekunku lyo H1N1 lya kolekwa

OONKAMBADHALA ta dhi tsikile mekondjitho lyomukithi gwekunku lyo H1N1 ngoka gwa tseyika woo ongo ekunku lyiingulu,odha nkondopekwa sho dha pewa oodola dha Namibia omiliona yimwe noshikwanu yimwe.

Iimaliwa mbika oya gandjwa kehangano lyedhina Inter African Bureau for Animal Resource, sha pitile moshitayi sha lyo ha shi ithanwa Support Programme to Integrated National Action Plan on Avian and Human Influenza in Africa. Ehangano ndika olyo mongundu yomahangano ngoka ge li iitayi yehangano lyUukumwe wAfrica.Omalalakano goprograma ndjika olyo okushonopeka nkene uuvu mbuka ta u gumu aantu pankalathano no pamahupilo.Iimaliwa mbika oyo, oshitopolwa shoopelesenda 50 dhiimaliwa mbyoka epangelo lya indilile konyala oomvula mbali dha piti opo li pewe ekwatho lyo pa shimaliwa oku koleka eilongekidho lyalyo mokukondjitha ekunku lyuudhila ndyoka lya li lyiihanena uuyuni 2007. Omunashipundi sho NHEMC omundohotola, Jack Vries okwa ti ekwatho lyopashimaliwa ndika ota li ka kwathela miinakugwanithwa oyindji, mbyoka ta yi longwa shi na sha no ku koleka eilongekidho lyoshilongo opo shi kondjithe uuvu wekunku lyo H1N1 nawa.Ethimbo, sho ngashingeyi lyuuka pokwenye omundohotola Vries okwa londodha kutya ngele opu na omuntu a kwatwa kekunku nena na tseye kutya ndika ka li shi ekunku lyokomumvo ndele oli na okukala ekunku lyo H1N1. ‘Ngele omuntu okwe ya koshipangelo nomandhindhiliko ga fa gekunku lyo H1N1 nena omuntu a tya ngaaka ota pangwa nomuti gwo Tamiflu’, tati ngaaka nokwa gwe dha po ta ti omushangwa kombinga yomulandu gwatya ngaaka ota gu ka gandjwa mbala koonganga adhihe moshilongo. ‘Ota tu ka gwedha mo stock, yomuti gwo Tamiflu ngele osha pumbiwa’Vries okwa ti’ Ina tu hala aavu ya se’ Sigo oompaka omuNamibia gumwe ashike asi, sha etwa kekunku lyoH1N1.Omunangeshefa gwopOshikango okwa si nosha monika kutya osheeti sheso lye, ekunku lyoH1N1, konima sho omudhimba gwe gwa konakonwa. Iiningwanima iipe iyali yuuvu mbuka oya kolekwa metine mOmbaye no Shaanda. Omandhindhiliko guuvu mbuka oga kwatelamo epupyalo nenge olwiidhi luupyu w 38 degrees moshiyelekitho shaCelsius,omukolo, omuligu tagu ehama, omanino nenge omayulu ga thita, olutu ta lu ehama, omutse tagu ehama, uutalala nomvulwe. Omathimbo gamwe omuvu ota kungu ye oku na oshimela.