Ekanka pu NovaNam otali tsikile

EKANKA lyaaniilonga ye li 1 000 lwaampoka pofaambulika yOkampani yoohi ya NovaNam pOliindili ndyoka lya tameke petameko lyomwedhi gwa zi ko, otali pula natango komeho.

Ekanka ndika olya tameke konima sho ehangano lyaaniilonga lya Namibia Seamen and Allied Workers Union (Nasawu) newiliko lyOkompani ya ndopa okutsa kumwe kombinga yeindilo lyaaniilonga kutya oondjambi dhawo nadhi gwedhelwe.
Omuwiliki gOshitayi sha Nasawu pOliindili Petrus Shiyandja okwa ti ehangano olya tegelela natango eyamukolo kOkmampani kombinga yosheetwapo shoka ya gandja kuyo opo oshinima shika shi manithwe. Nasawu na NovaNam oya kuutumba ashike lumwe sho ekanka ndika lya tameke.
Ekanka ndika olya li lya lyata ompadhi mOmangu yAaniilonga omwedhi gwa zo ko, konima sho NavaNam a popi kuytya aaniilonga mboka ya ningi ekanka oya li ya thindilekongudhu nokuningila omatilitho ooyakwawo mboka inaye ya ndjoina mekanka.
Omupanguli Louis Muller okwa li nee a gandja elombwelo kutya aaniilonga mboka ye li mekanka inaye ya meni lyoometa 400 nofaambulika nenge ya piyaganeke yakwawo mboka kaye li mekanka.
Muller oka li wo a popi kutya aaniilonga mboka ye li mekanka inaya dhenge nenge ya ningila omatilitho mboka kaye li menkanka nenge ookastoma dhOkampani. Opolisi oya li wo ya lombwele yi kale ya tala kutya pofaambulika ya NovaNam itapu unyenge omakuyunguto.
Shiyandja okwa ti aaniilonga ye li 400 lwaampoka inaya kutha ombinga mekanka na pethimbo ndika oye li komagumbo ya tegelela iilonga yi shuna ngashi sha li.