Banner Left
Banner Right

Ekandjo ota kondjifa ondunge yoSwapo yokukoleka Netumbo Nandi-Nandaitwah a ninge pelesidente wongudu

Jerry Ekandjo

Minista wOkabinete mukulu Jerry Ekandjo okwa ti eendululo loSwapo lokuteya ekotamhango lavo vene ola eta ongudu i kanife oipundi i li 12 momutumba wopashiwana momahoololo axuninwa.

Ekandjo okwa ti ekoleko lomupedu pelesidente Netumbo Nandi-Ndaitwah ongopelesidente wongudu koshoomngalele osho tashi ka ningwa kongudu omukalo umwe kokuteya ekotamhango.

Oshoongalele shoSwapo shokuuhoolola pelesidente wongudu osha teelelwa shi ka kale ko momafiku 28 Febuluali, oko omuhoololwa pelesidente Netumbo Nandi-Ndaitwah kwa teelelika a ka kolekwe ongomupelesidente wongudu tai pangele.

Ekandjo okwa nyolela kuhamushangandjai woSwapo Sophia Shaningwa oshivike sha dja ko, ta ti etokolo lokukoleka omuhoololwa pelesident a ninge pelesidente wongudu ka li li pakotamhango.

“Oilyo aishe yomongudumutima oi shi shi nawa kutya keshe omhito mongudu oi na okuningilwa omafiyafano. Navo ove shi shi kutya oshitya “ekoleko” ihashi longifwa mekotamhango longudu yoSwapo,” Ekandjo osho a ti ngaho.
Ekandjo Etine loshivikle sha dja okwa li a koleka kutya omukanda owoshili.

“Onda yandja omukanda ou kombelewa yoye u talike nawa koilyo aishe yongudumutima. Onda uda okupitila moikundaneki kutya oshoongalele shaxuuninwa, okwa li kwa ningwa etokolo lokuninga oshoongalele shokuhoolola pelesidente wongudu okuuka pexulilo laFebuluali 2025, nelalakano linene lokukoleka omupedu pelesidnete wongudu opo a ninge pelesidente wongudu yoSwapo,” Osho a ti ngaho.

Ekandjo okwa ti etokolo longudumutima kali li pekotamhango longudu yoSwapo nola pita pomunghulo omulandu noukumwe wongudu.
“Ongudumutima oya teya ekotamhango eshi inai pula ku ningwe oshoongalele shokuhoolola pelesidente wongudu konima yeemwedi nhatu eshi omhito oyo kwa li ya holoka mombelewa yapelesidente, ngaashi sha popiwa mokatendo 15(9) kekotamhango longudu,” Osho a ti ngaho.

Konima yomafiku avali eshi pelesidente mukulu woSwapo Hage Geingob a xulifa, Ekandjo okwa li a shakena naShaningwa mombelewa yaye opo va kundafane osho oilyo yongudumutima ya teelela ngaashi shi li mekotamhango longudu.
“Ove shi shi kutya keshe okandidate youpelesidente oi na okuningilwa omahoololo ngaashi eeveta nomalandulafano ongudu yoSwapo taa ti,” Osho a ti ngaho.

Omunapolitika mukulu, oo kwa li a kwatela komesho oveta i li ominge neehombo domashenge oyo ya tulwa moilonga mafiku aa, okwa ti omhito nai ningilwe omafiyafano kwa talika kovanhu voukwatya aushe shi fike pamwe. “Okuteya ekotamhango loSwapo owina oku okwa eta opo Swapo a kanife oipundi imwe momutumba wopashiwana ndee inatu hala oshinima osho shi ka ningwe vali momahoololo omonakwiiwa.”

Oipundi yoSwapo yomomutumba wopashiwa oya shuna pedu noipundi i li 12, konima eshi ongudu ya findana oipundi i li 51 momudo 2024 momahoololo omutumba wopashiwana. Ongudu paife oi na oipundi i li 63 yomoipundi i li 96 ya findanwa momahoololo omutumba wopashiwana omudo 2019.

“Ohandi pula nee oongudumutima opo i liufe keeveta nomalandulafano dekotamhango ndee tai alula efimano loSwapo,” Ekandjo osho a ti ngaho.
Omundjadjukununi woikwapolitika Ndumba Kamwanyah okwa ti omukanda waEkandjo waxuuninwa owa hala kutya paife ngaha moSwapo omu na omatopokafano.

“Olo engwangwano ovo ve ne ve li eta nelambo omo tave lihange. Okwa li yoo wa pumbwa okukala u na omupedu pelesidente.
Ofiyo onaini tava efa omhito youpedu pelesidente i kale ihe na omunhu? Fiyo okoshoongalele shokuhoolola pelesidente tashi shikula ko? Pakotamhango osho kashi shi omulandu u li mondjila. Otava ningi oinima idjuu eshi itava landula omilandu nomalandulafano,” Osho a ti ngaho.

Omundjadjukununi Erika Thomas okwa ti opwa pumbwa okutalwa nawa kutya omolwashike Ekandjo ta fininike oshinima eshi. “Ekandjo okwa li a mwena eshi pelesidente mukulu Hage Geingob kwa li a ya koshipundi shoSwapo momukalo wa faafana.

Omolwashike ina popya nale? Oshi na sha noukakwashikekookanhu? Ekondjifo eli kali li nawa. Ngee otwa tale kondjokonona, ohatu dulu okuuya po nomapulo. Oupyakadi waye owa fa uhe na nekotamhango loSwapo. Netu ulikile kutya oshinima eshi kashi na sha nokukala a hala ashike ovalumenhu ovo va kale melelo,” Osho a weda po ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News