Banner Left

Eiseb okwa ningila Namibia oshinima shakula – Ofamili

Francis ‘Gosha’ Eiseb

Omunandjungu moilonga yaye, omuholi wovanhu nomunashili.

Ei oitya itatu oyo ya kala nokulongifwa eshi ofamili nookaume tava tangumuna nakudipawa oo e li kwa li omukulunhu weameno woNamib Desert Diamonds (Namdia) Francis ‘Gosha’ Eiseb (57).

Eiseb okwa li a dipawa moilonga kehangano lepangelo mOvenduka pefimbo lomunyeka wokawe kongushu yeemiliyona N$350 Olomakaya.
Okwa kala nokulongela Namdia okudja momudo 2019.

Ofamili yaEiseb, ovanailonga pamwe naye nookaume Etitatu ove mu dimbulukwa nohole nedina ‘Gosha’ “Omulumenhu e hole ofamili noku na oshili, kashi shi ashike kwaavo ve li popepi naye, ashike nokoshilongo yoo shaye,” Bryan Eiseb osho a ti ngaho Etitatu.

Okwa ti Eiseb okwa ninga oshinima shakula eshi aamena osho kwa li a itavela kutya osha fimana koshilongo.

“Ngee eedjo detu dopaushitwe da ponokelwa nongee ohaandimwe va tula omauwa avo komesho ponhele yoshilongo, inatu ka nifa nande elineekelo nde nee otashi pula tu yandje eemwenyo detu. Ndee osho osho a ninga,” Bryan osho a ti ngaho.

Okwa itavela kutya Eiseb ke na nande ofiku a pitike nande omunhu umwe a mone omauwa meliko loshilongo paumwene, ponhele yovanhu aveshe.
“. . . sho osho ehe li vali nashe,” Osho a ti ngaho.

Bryan okwa ti Eiseb omulumenhu e hole ofamili oo kwa li e litula mo.

“Ngee okwa tokola oshinima shonhumba, ote shi ningi ashike nawa, neendunge nonelineekelo,” Osho a ti ngaho.
Bryan okwa ti Eiseb ita ningi nande oshinima shii.

KEUMBO, NOILONGA

Eiseb okwa kulila koKeetmanshoop.
“. . . ashike kondadalunde otwa kulila mofaalama natatekulu wange. Onghe nee, Gosha otatekulu wange womepata, ashike otwa kulila meumbo limwe.

“Onda tekulwa kutatekulu nameekulu. Sho osho natango oku li omumwamememati,” Bryan osho a ti ngaho.

Eshi kwa li ta popi kombinga yoilonga yaye, okwa ti Eiseb okwa ninga omupolifi konima a dja mofikola, ashike okwa ka tameka okulongela ehangano ledina Salini Impregilo olo la tunga ondama yaNeckartal oyo i li eekilometa 40 pondje yoKeetmashoop.

“Okwa longela oLDD Diamonds Namibia opo nee a ka longele Namdia ongomukulunhu weameno.”
Bryan okwa dimbulukwa kombinga yeenghundafana davo daxuuninwa konima yoChrismas.

“Ou shi kutya, Gosha okwa li e hole okwiimba nokwa li ha imbi obaafa okwa li nde mu tumina okavidio. Okwa li ta ti ota ka kendabala ndee ta holele omunhu ou,” Osho a ti ngaho.

Bryan naEiseb okwa li hava longo aveshe koNamdia eshi Bryan kwa li omunashipundi wewilikongudu okudja muDesemba 2019 fiyo Marsa 2024.

“Eshi nda waimina Namdia momudo 2019, okwe ya keumbo lange ndee ta lombwele nge ‘tala, ondi shi kutya paife ou li pombada yehangano eli, ashike kala shike u shi shi kutya ame omumwanyoko akula nou na okupwilikina kwaame alushe ngee handi ku kumainda’,” Bryan osho a dimbulukwa osho.

‘OKAWE KANGE’

Kaume kopofingo kaEiseb nomunailonga pamwe naye mukulu, Hannes McKay, Etitatu okwa ti onghundana yefyo laye okwa li ya fa okawe kanyanyaulwa po.

“Okawe oshinima shikukutu mounyuni. Ouwe vamwe ohava tete ouwe vakwao. Ouwe ihava tatuka ashike keenghono dongaho, ohava tatuka keenghono dolela,” Osho a ti ngaho.

“Okwa li sha fa okawe ka tatulwa keenghono dolela moipambu i li eemiliyona dihapu. Osho nde shi tambula ko ngaho nde ito dulu okukatula vali kumwe.”

MacKay okwa ti itapa ka kala vali Eiseb nande oumwe.

“Itapa ka kala vali nande pu na Gosha umwe kwaame,” Osho a ti ngaho.

McKay naEiseb ova kulila pamwe koKeetmashoop, ashike kava li naana ookaume vopofingo fiyo va tameka okulongela pamwe.

“Ashike ngee wa tameke okushiiva omunhu, owa pumbwa ovanhu vamwe ovo u wete kutya ova pumbiwa mokuyandja omayele moilonga oyo to longo, omo wa pumbwa oukwashili nelitulemo,” Osho a ti ngaho.

Eshi osha xwaxwameka oukaume oo itau xulu fiyo efiku laxuuninwa laEiseb.

“Omunhu wotete nda dengela eshi nda tameka okulonga koLLD okwa li Gosha ndee onde mu lombwela ila u vatele nge ndi shiive osystema.

“KoNamdia, onda tameka ko aame auke ongomwaaneni womaliko nokwa li nda pumbwa okukonga ovanhu vamwe. Ndee oye alushe ndi na okudengela,” McKay osho a ti ngaho.
Okwa li va tameka okulonga pamwe koSamicor Diamond Mining pomido dopetameko lo2000.

OMUNADJUNGU MOILONGA

Omuhona waEiseb mukulu koLLD Diamonds, Kombadayedu Kapwanga, Etitatu okwa ti okwa mona Eiseb lwaxuuninwa efiku a xulifa.
Eiseb okwa longela ehangano laye eedula di fike puheyali, osho a ti ngaho.

“Nefiku ngaa olo a xulifa, okwa li ashike e li motuwa ta piti pwaame ndee te ya kwaame a tye ‘hello KK’ okudja opo otwa ya keumbo laye,” Kapwanga osho a dimbulukwa osho.

Okwa ti Eiseb okwa li omunandjungu moilonga yaye.
“Kakwa li e lihole. Okwa li omunambili kukeshe umwe.

Eeno, okwa li omunailonga pamwe naame omulituli mo,” Osho a ti ngaho.

Petameko loshivike eshi, omunailonga pamwe naEiseb mukulu, Kennedy Hamutenya, okwa ti, omukulunhuwilki weameno okwa li omunandjungu nomunailonga e na elitulemo oo ha longo shi dule nopwaasho oilonga tai pula.

“Oha dulu nokuliyamba a twale nokukatala ovayakulwa okuya nokudja kokapale keedila opo a kwashilipaleke eameno lavo,” Osho kwa li a shanga ngaho komalungula.

“Okwa li omulumenhu muwa. Okwa li omunambili,” Hamutenya osho a ti ngaho.

Oshitufidimbuluko shaEiseb osha ningwa onguloshi koHochland park.
Eiseb okwa fiya ko omukulukadi waye nounona vaheyali.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News